ახალციხეში გაზით დედა–შვილი მოიწამლა

შემთხვევა, 20 აპრილს დაახლოებით 01:00 საათზე მოხდა. როგორც ახლობლები ყვებიან, დედა და შვილი სახლში მარტო იყვნენ,თავი შეუძლოდ იგრძნეს და დასახმარებლად მეგობარს დაურეკეს.

ადგილზე სასწრაფო დახმარება სწორედ მეგობარმა გამოიძახა. 22 წლის გოგონა, დედასთან ერთად კლინიკა „იმედში“ გადაიყვანეს.

„ერთ–ერთ მათგანი გონების დაბინდვით შემოვიდა.მწვავე ინტოქსიკაცია იყო, თუმცა მდგომარეობიდან მალე გამოვიდნენ“,– განუცხადეს „სამხრეთის კარიბჭეს“ კლინიკა „იმედში“.

მათივე ინფორმაციით, დედა–შვილი დღეს, 21 აპრილს დილით სახლში გაეწერნენ.

როგორც მოწამლულებისახლობლები ამბობენ, გაზის გაჟონვა სავარაუდოდ გაუმართავმა „კარმას“ გამათბობელმა გამოიწვია.

მომხდართან დაკავშირებით, ინფორმაცია არ შესულა გაზის კომპანიაშია.

„ამ ამბის შესახებ, თქვენგან მესმის. ზოგჯერ, გამათბობლებს თვითნებურად ამონტაჟებენ, ჩვენი გაფრთხილების გარეშე და ამიტომაც ხდება ასეთი შემთხვევები“,–ამბობს „ინტერგაზის“ დირექტორი ვასილ აბულაძე.

ოჯახმა ბინა, სადაც გაზით მოიწამლნენ დაახლოებით ორი თვის წინ იქირავა.

რა გახდა გაზის გაჟონვის მიზეზი, შინაგან საქმეთა სამინისტრო შეისწავლის.

უწყების ინფორმაციით, საქმეზე ძიება სსკ–ს, 240–ე პრიმა მუხლის, პირველი ნაწილით დაიწყო, რაც ელექტრო ან თბოენერგიის, გაზის, ნავთობის ან ნავთობპროდუქტების ობიექტის განლაგების, დაპროექტების, მშენებლობის ან ექსპლუატაციის დროს უსაფრთხოების წესების დარღვევას გულისხმობს, რამაც ჯანმრთელობის ნაკლებად მძიმე ან მძიმე დაზიანება გამოიწვია.

[ლუბა გიორგაძე, ახალციხე]