‘გაუშვეს რატომღაც ერთი ტესტის საფუძველზე, მეორე იყო სუსტად დადებითი’ - გამყრელიძე ნინოწმინდელ კაცზე

გამყრელიძე გამორიცხავს ექიმების მხრიდან ანალიზების არევის ფაქტს და ამბობს, რომ 44 წლის კაცს ტესტი ორჯერ ჩაუტარდა და „რატომღაც“ ერთი ტესტის საფუძველზე გაუშვეს საკარანტინო ზონიდან: „კვლევა მიმდინარეობს, ტესტების არევა არ მომხდარა. კარანტინში ორჯერ გაიტესტა და ახლა ხდება მისი განმეორებითი ტესტირება. გაუშვეს რატომღაც ერთი ტესტის საფუძველზე, როცა მეორე იყო სუსტად დადებითი და ახლა ხდება მისი ჩაღრმავებული კვლევა. სისხლის გამოკვლევა მოხდება. ის ახლა გადაყვანილია გორის ჰოსპიტალში და ვფიქრობთ, რომ არაფერი განსაკუთრებული იქ არ იქნება“, – აღნიშნა გამყრელიძემ.

იგი ვარაუდობს, რომ ყაურმაში მცხოვრები კაცი უკვე გამოჯანმრთელებულია:

„არ არის სწორი ინტერპრეტაცია, რომ ორი დღის შემდეგ აღმოაჩინეს. ის იდენტიფიცირებული იყო, გარკვეულ შეუთანხმებლობას ჰქონდა ადგილი, რომელსაც ახლა ვიკვლევთ. დიდი ალბათობით, ეს ადამიანი არის გამოჯანმრთელებული. აიღებენ სისხლს, გამოიკვლევენ ანტისხეულებზე და მე დარწმუნებული ვარ, რომ დიდი ალბათობით, ჩვენ იქ ინფექცია არ გვაქვს“, – განმარტა ამირან გამყრელიძემ.

საქმე ეხება 44 წლის ყაურმაში მცხოვრებ კაცს, რომელიც რუსეთიდან 20 დღის წინ ჩამოვიდა, 18 დღიანი კარანტინი გუდაურის ერთ–ერთ სასტუმროში გაიარა და სოფელში 31 მაისს დაბრუნდა. მერის წარმომადგენლის და საზოგადოებრივი ჯანდაცვის ცენტრის ხელმძღვანელის განცხადებით, იგი კორონავირუსით იყო ინფიცირებული, ექიმებმა კი ეს მისი სახლში გაშვებიდან, ორი დღის შემდეგ აღმოაჩინეს.

სოფელ ყაურმაში მერის წარმომადგენელი ეგორ თოროიანი აცხადებს, რომ 44 წლის კაცს ოჯახის წევრების გარდა, 100 ადამიანთან ჰქონდა კონტაქტი.

[თაკო ფეიქრიშვილი]