‘ეს არ არის დადასტურებული’ - მარინა ეზუგბაია ნინოწმინდის შემთხვევაზე

სოფელ ყაურმას შემთხვევის შესახებ დღეს, 3 ივნისს მარინა ეზუგბაიას კითხვა ჟურნალისტმა დაუსვა. ინფექციური საავადმყოფოს სამედიცინო დირექტორი ამბობს, რომ ამ ფაქტის შესახებ ინფორმაცია არ აქვს: ”მე ინფორმაცია არ მაქვს, ეს ადამიანი სახლიდან მოვიდა?“ - იკითხა ეზუგბაიამ.

მისივე თქმით, ინფორმაცია დაუზუსტებელია, ამიტომ ვერ ისაუბრებს: „თქვენ დარწმუნებული ხართ ამ ინფორმაციაში? მაშინ მე რატომ მეკითხებით თუ დარწმუნებული ხართ? ე.ი არ ხართ დარწმუნებული, ამიტომ ეს არ არის დადასტურებული ინფორმაცია და ამიტომ რაც დადასტურებული არ არის, იმაზე ნუ ვილაპარაკებთ“.

დღეს, 3 ივნისს „სამხრეთის კარიბჭესთან“ მერის წარმომადგენელი სოფელ ყაურმაში და ასევე ნინოწმინდის ჯანდაცვის ცენტრის ხელმძღვანელი აცხადებენ, რომ მოსახლეობას იზოლაციისკენ მოუწოდეს: „გაფრთხილებული გვყავს მოსახლეობა, რომ სახლებიდან არ გამოვიდნენ, კონტაქტში არავისთან შევიდნენ, ველოდებით ტესტების პასუხებს“, - ამბობს მერის წარმომადგენელი სოფელ ყაურმაში ეგორ თოროიანი.

საქმე ეხება 44 წლის ყაურმაში მცხოვრებ კაცს, რომელიც რუსეთიდან 20 დღის წინ ჩამოვიდა, 18 დღიანი კარანტინი გუდაურის ერთ–ერთ სასტუმროში გაიარა და სოფელში 31 მაისს დაბრუნდა. მერის წარმომადგენლის და საზოგადოებრივი ჯანდაცვის ცენტრის ხელმძღვანელის განცხადებით იგი კორონავირუსით იყო ინფიცირებული, ექიმებმა კი ეს მისი სახლში გაშვებიდან, ორი დღის შემდეგ აღმოაჩინეს.

[თაკო ფეიქრიშვილი]