‘სოფლის ჩაკეტვა იგეგმება’ – ყაურმის რწმუნებული

„ჯერ ჩაკეტილი არ არის სოფელი, მაგრამ ვემზადებით რომ ჩაიკეტოს, ბრძანება უკვე მიღებულია“, – აცხადებს სოფელ ყაურმაში მერის წარმომადგენელი.

სოფელში ადგილობრივები აცხადებენ, რომ საზოგადოებრივი ჯანდაცვის ცენტრის წარმომადგენლებმა გააფრთხილეს, რომ სახლიდან გარეთ არ გამოვიდნენ.

ყაურმაში მომხდართან დაკავშირებით ნინოწმინდის მუნიციპალიტეტის მერიაში თათბირი ჩატარდა. მერმა, ანივარდ მოსოიანმა "სამხრეთის კარიბჭესთან" განაცხადა, რომ მითითებებს ჯანდაცვის სამინისტროდან ელოდებიან.

დაავადებათა კონტროლის ეროვნული ცენტრის სამცხე–ჯავახეთის განყოფილებაში კომენტარს არ აკეთებენ, განყოფილების უფროსმა ნინო ზედგინიძემ "სამხრეთის კარიბჭეს" სატელეფონო საუბრის დროს უთხრა, რომ კომენტარს 10 წუთის შემდეგ გააკეთებდა, თუმცა შემდეგ ჩვენს ზარებს არ უპასუხა.

მსგავსი ქმედება ზედგინიძის მხრიდან პირველი არ არის, ქვეყანაში კორონავირუსის გავრცელების შემდეგ, იგი ჟურნალისტების ზარებს ხშირ შემთხვევაში არ პასუხობს.

კორონავირუსით ინფიცირებული 44 წლის კაცი, გუდაურის საკარანტინო სივრციდან ყაურმაში 31 მაისს დაბრუნდა. ორი დღის შემდეგ სასწრაფო სამედიცინო დახმარების ჯგუფმა, პოლიციის თანხლებით გორის სამხედრო ჰოსპიტალში გადაიყვანა.

ნინოწმინდის საზოგადოებრივი ჯანდაცვის ცენტრის და სოფელში მერის წარმომადგენლის განცხადებით, საკარანტინო სივრცეში ექიმებს ანალიზის პასუხები აერიათ და შეცდომით სახლში კორონავირუსით ინფიცირებული მოქალაქე გაუშვეს.

44 წლის კაცს განმეორებით ტესტირება ორ ივნისს გაუკეთეს, მას კორონავიურსი დღეს დაუდასტურდა.

ყაურმაში 300–მდე ადამიანი ცხოვრობს, მერის წარმომადგენელი ეგორ თოროიანი აცხადებს, რომ ინფიცირებულს ოჯახის წევრების გარდა, თითქმის ყველა მოსახლესთან ჰქონდა კონტაქტი.

მასალის გამოქვენების შემდეგ, დაავადებათა კონტროლის ეროვნული ცენტრის ხელმძღვანელმა ამირან გამყრელიძემ ჟურნალისტებთან განაცხადა, რომ ნინოწმინდის სოფელ ყაურმაში მცხოვრები კაცის ანალიზები ექიმებს არ შეშლიათ და იგი მხოლოდ ერთი ტესტის საფუძველზე გაუშვეს საკარანტინო ზონიდან, მაშინ როცა მეორე ტესტი სუსტად დადებითი იყო.

[თაკო ფეიქრიშვილი, რიმა სარუხანიანი, ნინოწმინდა]