გარემოს დაცვის სამინისტროსთვის ახალქალაქში არასწორი სია შეადგინეს

იმ ოჯახების მონაცემები, რომლებიც ზამთარში შეშის ღუმელებით თბებიან, ახალქალაქში სპონტანურად და არასწორად შეაგროვეს. ნაცვლად იმ მცხოვრებლებისა, რომლებიც გამოზამთრებას შეშის ღუმელებით აპირებენ, თავდაპირველად ახალქალაქში არაგაზიფიცირებული საცხოვრებელი სახლების სია შეადგინეს. მაგალითდ, სოფლებში ხალხს უთხრეს, რომ ვინც გაზიფიცირებული არ არის, მათ ბუნებრივ აირს უფასოდ შეუყვანდნენ და მონაცემებიც ამიტომ გროვდებოდა. ცხადია, ამ სიახლემ ადგილობრივები ძალიან გაახარა.

„მითხრეს, რომ სოფელში შემედგინა ხალხის სია, ვისაც გაზი არ აქვს. ჩემი ინფორმაციის საფუძველზე, პრემიერ მინისტრმა ბიძინა ივანიშვილმა საკუთარი ფონდიდან გამოყო ფული, რომ გაზი ყველას ჰქონდეს“, - ამბობს არმენ აივაზიანი, რომელსაც იმედი აქვს, რომ გაზიფიცირებაში ფულს აღარ გადაიხდის.

ქალაქ ახალქალაქში კი რწმუნებულები, რომლებიც მონაცემებს აგროვებდნენ, ადგილობროვებს ეუბნებოდნენ, რომ ეს ინფორმაცია გაზიფიკაციის ვაუჩერების დასარიგებლად გროვდება. ისინი ამბობდნენ, რომ ვაუჩერის მფლობელები გაზს შეღავათიანი ფასით შეიყვანდნენ სახლში, სახელდებოდა თანხაც - 15 ლარი ერთ მეტრზე.

ახალქალაქის მუნიციპალიტეტის გამგეობაში 4 ნოემბერს მუნიციპალიტეტის არაგაზიფიცირებულ სახლებზე ინფორმაციის შეგროვების შესახებ კონკრეტული ვერაფერი გვითხრეს. მათი თქმით, ჯერჯერობით არ იციან მონაცემები რატომ შეაგროვეს. სამუშაოს შესასრულებლად ორი დღე ჰქონდათ და სიები შეიძლება ზუსტი არ იყოს, რადგან ორ დღეში მხოლოდ იმ ოჯახების მონაცემების შეგროვება მოასწრეს, ვინც სახლში დახვდათ.

7 ნოემბრის მონაცემებით, თავდაპირველი სამინისტროში 3,396 კაციანი სია გაიგზავნა. აქ შედის მუნიციპალიტეტის არაგაზიფიცირებული სოფლების მცხოვრები 2,253 ოჯახი, 645 ოჯახი ქალაქიდან და 498 ოჯახი სოციალურად დაუცველთა ბაზიდან.

7 ნოემბრის შემდეგ სიაში შეყვანის მოთხოვნით გამგეობას 29 ადამიანმა მიმართა. რადგან სია უკვე გაგზავნილი იყო, 29-კაციანი სია გარემოს დაცვის სამინისტროში დამატებით უნდა გაეგზავნათ. თუმცა მიიღებენ თუ არა დამატებით სიას, ან შეძლებენ თუ არა უკვე გაგზავნილის შესწორებას, გამგეობაში ჯერ არ იციან.

[აღუნიკ აივაზიანი, ახალქალაქი]