სამცხე–ჯავახეთში 256 დასახლებული პუნქტიდან 104–ია გაზიფიცირებული

ადიგენის 57 დასახლებული პუნქტიდან გაზი შეყვანილი მხოლოდ სამშია, ახალციხეში 45 სოფლიდან გაზიფიცირებული 14–ია, ასპინძაში 25 დასახლებიდან ბუნებრივი აირი ოთხშია, ბორჯომში 34 სოფლიდან გაზიფიცირებული 18–ია, ახალქლაქის 64 სოფლიდან გაზი შეყვანილი 42–შია, ნინოწმინდაში კი 31 სოფლიდან 22 უკვე გაზიფიცირებულია.

ამ დროისთვის რეგიონის მასშტაბით გაზიფიცირების პროცესი მხოლოდ ადიგენის სამ დასახლებულ პუნქტში მიმდინარეობს. მათ შორის ერთ–ერთი კურორტი აბასთუმანია.

რომელი სოფლის გაზიფიცირება როდისთვისაა დაგეგმილი თვითმმართველობებში ზუსტად ამის შესახებ არ იციან.

„ამ ეტაპზე ასპინძის მუნიციპალიტეტის მერიას არ გააჩნია ინფორმაცია რა ვადებში დაიწყება დარჩენილ სოფლებში გაზიფიცირების სამუშაოები“,– ნათქვამია ასპინძის მერიიდან მიღებულ წერილში.

ბორჯომის მერიიდან კი მოგვწერეს, რომ დარჩენილი 16 სოფლიდან 13–ის გაზიფიცირება მიმდინარე წელს იგეგმება, სამში კი არავინ ცხოვრობს და იქ გაზი როდის შევა, ეს ჯერ გადაწყვეტილი არაა.

სამცხე–ჯავახეთში გაზის სამი კომპანია მუშაობს: „ინტერგაზი“, „ეს ჯი გაზი“ და „სოკარი“. „ინტერგაზსა“ და „სოკარში“ აცხადებენ, რომ მიმდინარე წელს რომელი სოფლების გაზიფიცირებას დაიწყებენ ჯერ არ იციან.

„სოფლების გაზიფიცირების საკითხთან დაკავშირებით სათაო ოფისიდან ჯერ დავალება არ მიგვიღია“, – გვითხრეს „ეს ჯი გაზში“.

[ლუბა გიორგაძე, ახალციხე]