სტიქიის გამო ექვსი ადამიანი დაშავდა

კლდის ნაშალმა გზაზე მიმავალი ავტომობილი, რომელშიც ექვსი ადამიანი იმყოფებოდა, ხევში გადააგდო. შემთხვევა წმინდა გიორგის სახელობის ეკლესიასთან, შაბათს საღამოს მოხდა.

ერთ-ერთი დაშავებული, ოთარ კაპანაძე მეგობრებთან ერთად, ურაველში ტაქსით მიდიოდა.

“ტაძართან რომ მისულან, პირჯვარი გადაუწერიათ და ამის შემდეგ არავის არაფერი ახსოვს – გვიამბობს ოთარ კაპანაძის მამა ავთანდილ კაპანაძე, - ამოსულა ოთარი მანქანიდან და იქვე, რესტორნამდე ცდილობდა მისვლას, რომ ვინმესთვის შველა ეთხოვა. ამ დროს ურავლიდან მანქანას გამოუვლია, სისხლიანი რომ დაუნახავთ გაუჩერებიათ. მათ დაურეკავთ სასწრაფოსთვის და მაშველებთანაც”.

დაშავებულები ახალციხის რაიონულ საავადმყოფოში დაახლოებით 20:00 საათისთვის მიიყვანეს. მათ შორის ყველაზე მძიმედ გუჯა კოპაძე იყო.

“სახეზე ჰქონდა ჭრილობა და დაჟეჟილობა, ასევე დაჟეჟილი ჰქონდა ხერხემალი მთელ სიგრძეზე და თირკმელი მარჯვენა მხარეს”, - ამბობს ახალციხის რაიონული საავადმყოფოს ქირურგი დათო ჯინჭველძე.

კოპაძე ერთი დღით სტაციონარში დატოვეს. თუმცა, მისი ჯანმრთელობის მდგომარეობას გართულება არ მოჰყოლია, ამიტომ გაწერეს და ამჟამად შინ მკურნალობს.

ამბულატორიულად მკურნალობს ოთარ კაპანაძეც.

“ოთარს საფეთქლის არეში დიდი, 10-12 სანტიმეტრი სიგრძის ჭრილობა ჰქონდა. მარჯვენა მხარეს კანის მთლიანი დაზიანება აღენიშნებოდა. მძღოლს გულმკერდის არე ჰქონდა დაჟეჟილი. ასევე, ერთ-ერთ მათგანს თამარ გულბანს ხელზე მეხუთე ნების ძვალი აქვს მოტეხილი”, - გვიხსნის ჯინჭველაძე და ამატებს, რომ არცერთი მათგანის სიცოცხლეს საფრთხე არ ემუქრება.

ავთანდილ კაპანაძის თქმით, ჩამოწოლილი მეწყერი რომ მანქანას ზემოდან დასცემოდა, მგზავრების გადარჩენა შეუძლებელი იქნებოდა.

რაც შეეხება ჩახერგილ გზას, მეორე დღეს უკვე გაწმენდილი იყო.

“დეტალები არ ვიცი, გზა გავასუფთავეთ. შეიქმნება კომისია და ზარალს ის დაითვლის”, - განუცხადა “სამხრეთის კარიბჭეს” ახალციხის მუნიციპალიტეტის საკრებულოს თავმჯდომარემ მალხაზ გიქოშვილმა.

დეტალურ ინფორმაციას მომხდარის გამომწვევ მიზეზებზე, ”სამხრეთის კარიბჭე” უახლოეს დღეებში შემოგთავაზებთ.

[თამუნა უჩიძე, ახალციხე]