სვირის სამგზავრო ავტობუსის გადაბრუნების შედეგად ორი ადამიანი დაშავდა

შემთხვევა დღეს, 6 მარტს დაახლოებით 10:30 საათზე, სოფელ ტატანისში მოხდა. როგორც სვირის თემის ყოფილი რწმუნებული ბორის შუბითიძე გვიხსნის, ავტობუსში ექვსი ადამიანი იჯდა.

„სასწრაფო მოვიდა, მაგრამ არავინ იყო დაშავებული და დახმარება არც არავის დასჭირვებია. თუმცა, მოგვიანებით ერთ–ერთმა სვირში მცხოვრებმა თავი ცუდად იგრძნო და ექიმთან თავად მივიდა. გაესინჯა, კარგადაა და უკვე უკან დაბრუნდა“, – ამბობს შუბითიძე.

მომხდარის შემდეგ თავი ცუდად იგრძნო, ასევე, სოფელ ბოგაში მცხოვრებმა შუახნის ქალმაც. იგი საავადმყოფოში თანასოფლელებმა მიიყვანეს. მათი თქმით, მას მხოლოდ მსუბუქი ხარისხის დაჟეჟილობები აღმოაჩნდა.

ავარიის მიზეზი სამგზავრო ავტობუსის გაუმართაობა იყო.

„რისორი“ გაუტყდა წინა საბურავთან და ავტობუსი ამიტომ გადაბრუნდა“, – ამბობს შუბითიძე.

შემთხვევის ადგილზე მასთან ერთად ახალციხის მუნიციპალიტეტის გამგებელი ზაზა მელიქიძეც მივიდა.

„გადაბრუნებული ავტობუსი მაშველებმა ამოიყვანეს და ადგილზე დატოვეს“, – აცხადებს შუბითიძე.

[თამუნა უჩიძე, ახალციხე]