ბორჯომში ტურიზმის განვითარების გენერალური გეგმის შემუშავებაზე მუშაობა დასრულდა ®

გეგმის განხილვა ვიდეოკონფერენციის ფორმატში, პროექტში ჩართულ მხარეებს შორის მოეწყო.

ონლაინ შეხვედრაში მონაწილეობა მიიღეს გაეროს განვითარების პროგრამის (UNDP), ევროკავშირის, ტურიზმის ეროვნული ადმინისტრაციის, გარემოს დაცვისა და სოფლის მეურნეობის სამინისტროს, რეგიონული განვითარებისა და ინფრასტრუქტურის სამინისტროს, სამცხე-ჯავახეთის მხარის, ბორჯომის მუნიციპალიტეტის მერიისა და საკრებულოს, ასევე ადგილობრივი განვითარების (LAG) ჯგუფის წარმომადგენლებმა და სხვა დაინტერესებულმა მხარეებმა.

მონაწილეებმა ბორჯომისთვის აღნიშნული დოკუმენტის მნიშვნელობაზე ისაუბრეს და საკუთარი მოსაზრებები დააფიქსირეს.

COVID-19 პანდემიის გამოცხადების შემდეგ, აუცილებელი გახდა, მისი ასახვაც მომხდარიყო აღნიშნულ დოკუმენტში. თემას ერთი ქვე-თავი დაეთმო - „COVID-19-ის შედეგად შექმნილი ახალი რეალობა და საჭირო ქმედებები.“

ბორჯომის მუნიციპალიტეტის ტურიზმის განვითარების გენერალური გეგმის შემუშავება მხარდაჭერილია პროექტ „ENPARD-3: სოფლის განვითარების გაუმჯობესება საქართველოში“-ს მიერ, რომელსაც ახორციელებს გაეროს განვითარების პროგრამა (UNDP) ევროკავშირის (EU) დაფინანსებით.