სამცხე-ჯავახეთის უნივერსიტეტში სწავლის საფასურის გადახდის ვადა გახანგრძლივდა

სამცხე-ჯავახეთის სახელმწიფო უნივერსიტეტმა სტუდენტების სწავლის საფასურის გადახდასთან დაკავშირებით შეღავათები განსაზღვრა. უნივერსიტეტის რექტორის, მაკა ბერიძის განმარტებით, სწავლის საფასურის გადაუხდელობის გამო, გაზაფხულის სემესტრში სტატუსი არცერთ სტუდენტს შეუჩერდება.

„ვინაიდან, კორონავირუსთან დაკავშირებით, სტუდენტებს ექმნებათ გარკვეული ფინანსური სირთულეები, უნივერსიტეტმა მიიღო გადაწყვეტილება, რომელიც სერიოზულ შეღავათებს აძლევს სტუდენტებს. ახლა არის საგაზაფხულო სემესტრი და ჩვენი საშეღავათო პოლიტიკიდან გამომდინარე, არცერთ სტუდენტს არ შეუჩერდება სტატუსი სწავლის საფასურის გადაუხდელობის გამო. ყველა სტუდენტისთვის განცხადების გარეშე შეიძლება, რომ გადავადდეს საფასური, თუ მას უნდა რომ გადაუვადდეს ეს გადასახადი“.

მისივე თქმით, საფასურის გადახდის ვადებთან დაკავშირებული შეღავათები ეხებათ, როგორც დამამთავრებელი კურსის, ასევე არადამამთავრებელი კურსის სტუდენტებსაც.

„არადამამთავრებელი კურსის სტუდენტებისთვის გახანგრძლივდა თანხის გადახდის ვადა და შემოდგომის სემესტრის დასაწყისამდე, სავარაუდოდ 15 სექტემბრამდე ექნებათ საშუალება გადახდისა“, - ამბობს რექტორი.

მისივე თქმით, დამამთავრებელი კურსის სტუდენტებს, საკუთარი ფინანსური მდგომარეობიდან გამომდინარე, თავად შეუძლიათ აირჩიონ გადახდის თარიღი - ეს იქნება სექტემბერში, თუ სექტემბრამდე.

„მხოლოდ ის დამამთავრებელი კურსის სტუდენტები, რომლებსც აქვთ ფინანსური სირთულეები და ამის გამო ვერ შეძლებენ სწავლის საფასურის გადახდას, მათთვის დასკვნითი გამოცდების ძირითადი ვადები დაინიშნება სექტემბერში. დამამთავრებელი კურსის ის სტუდენტები, რომლებიც თანხის გადახდას შეძლებენ ჩვეულებრივ ვადაში, დაამთავრებენ უნივერსიტეტს ანუ ვინც იხდის ჩვეულ ვადებში, დაასრულებს უნივერსიტეტს ჩვეულ რეჟიმში“.

უნივერსიტეტს გეგმა აქვს, იმ შემთხვევაშიც, თუკი სტუდენტმა საფასურის გადახდა ვერც შემოდგომით მოახერხა: „თუ გაჩნდა რეალობა, როდესაც სექტემბერშიც სტუდენტებს გაუჩნდათ ფინანსური პრობლემები, ასეთ შემთხვევაში, ამოქმედდება უნივერსიტეტის შინაგანაწესის 41-ე მუხლი და უნივერსიტეტი სტუდენტებს შესთავაზებს ინდივიდუალურ გრაფიკს სწავლის საფასურის გადახდის“.

სამცხე-ჯაავხეთის სახელმწიფო უნივერსიტეტში სწავლის საფასური 2250 ლარს შეადგენს. უნივერსიტეტის აკადემიური კალენდრის მიხედვით, გადასახადის გადახდა სტუდენტს რამდენიმე ეტაპად შეუძლია.

[რიმა სარუხანიანი]