შვიდ სტუდენტს შესაძლოა სტუდენტის სტატუსი შეუწყდეს

გასული წლის ივლისში მოსული სეტყვის შედეგად სამცხე-ჯავახეთის სახელმწიფო სასწავლო უნივერსიტეტის ათი სტუდენტის ოჯახმა იზარალა. სტუდენტები დაპირებისამებრ სწავლის ღირებულების დაფარვას სახელმწიფოსგან სასწავლო წლის ბოლომდე ელოდნენ. თუმცა, 5 ივნისს შეიტყვეს, რომ მთავრობა მათ დახმარებას არ აპირებდა და თითოეულ მათგანს სწავლის საფასური თავად უნდა გადაეხადა.

ათი სტუდენტიდან ამ დრომდე დავალიანება მხოლოდ სამმა დაფარა. შვიდი სტუდენტის საკითხი კი ჯერ გაურკვეველია.

მეორე კურსის სტუდენტმა, ასპინძის მკვიდრმა ნათია ზედეგინიძემ, რომელიც სოციალურად დაუცველი ოჯახიდანაა, წლის ბოლომდე 1 750 ლარი უნდა გადაიხადოს, თუმცა, ფიქრობს, რომ მისი ოჯახი თანხის დაფარვას ვერ შეძლებს და ამიტომ სასწავლებლის დატოვება მოუხდება.

„იმ მოსავლის გაყიდვით უნდა დამეფარა სწავლის ფული, რომელიც სეტყვამ გაგვინადგურა. ამის მერე მამაც ავარიაში მოყვა და ამიტომ თანხის მოგროვება ვეღარ შევძელით, - ამბობს ზედგინიძე და ამატებს, რომ დაფინანსების თხოვნით განათლების სამინისტროს უკვე მიწერა - პასუხი ჯერ არ მიმიღია. თუ ისევ არ დამაფინანსებენ სასწავლებლიდან წამოვალ, ან აკადემიურს ავიღებ“.

იმ სტუდენტებს, რომლებიც მთავრობამ არ დააფინანსა, დახმარებას ახალციხის მაჟორიტარი დეპუტატი „საციონალური მოძრაობიდან“ ვაჟა ჩიტაშვილი დაჰპირდა. მან თქვა, რომ სტუდენტებისთვის სწავლის საფასურის გადახდას ყოფილ პრეზიდენტს მიხეილ სააკაშვილს სთხოვდა.

„სამწუხაროდ, არც პრეზიდენტს, არც პრემიერს და არც არავის, ეს სტუდენტები არ დაუფინანსებია, დაპირება დაპირებად დარჩა. ამ ახალგაზრდების დაფინანსება ვერ მოხერხდა“, - გვითხრა ჩიტაშვილმა.

სამცხე-ჯავახეთის სახელმწიფო სასაწავლო უნივერსიტეტის რექტორის მოადგილის ნიკოლოზ ახალკაცის განმარტებით, სტუდენტებს სწავლის დავალიანების გადახდის ვადა 27 დეკემბერს ეწურებათ: „წლის ბოლომდე თუ ვერ გადაიხდიან, ჩვენ კანონს ვერ დავარღვევთ და ამ სტუდენტებს სტუდენტის სტატუსი შეუწყდებათ“.

[თამუნა უჩიძე, ახალციხე]