ახალციხის მაჟორიტარი სტუდენტების დახმარებას პრეზიდენტსაც სთხოვს

გასული წლის ივლისში სეტყვის შედეგად დაზარალებული სტუდენტების მშობლები ახალციხის მუნიციპალიტეტის მაჟორიტარმა დეპუტატმა ვაჟა ჩიტაშვილმა პარლამენტში წაიყვანა.

„ადამიანის უფლებათა დაცვის კომიტეტის თავმჯდომარე პარლამენტში არ გახლდათ, ამიტომ მშობლები მის მოადგილეს შევახვედრე. ავუხსნეს მათი მდგომარეობის შესახებ და მინდა გითხრათ, რომ მოადგილემ მათი ნაამბობი არგუმენტირებულად მიიჩნია“, - ამბობს ჩიტაშვილი.

მისი თქმით, მშობლებმა კომიტეტში განცხადებაც დატოვეს: „პასუხს მე მაცნობებენ“.

ჩიტაშვილი ფიქრობს, რომ პარლამენტის მხირდან სტიქიით დაზარალებული სტუდენტებისათვის სწავლის საფასურის გადახდის შანსი ნაკლებია: „თუ უარი გვითხრეს, მაშინ პრეზიდენტს მივმართავ“.

სტიქიით დაზარალებული 10 სტუდენტიდან ამ დრომდე სწავლის საფასურის დაფარვა მხოლოდ 2-მა შეძლო.

სამცხე-ჯავახეთის უნივერსიტეტის რექტორის მოვალების შემსრულებლის მოადგილის ნიკოლოზ ახალკაცის განმარტებით მათ თანხის შეტანის ვადა 25 აგვისტოს ეწურებათ: „ერთი დღით ადრეც თუ შემოიტანენ, სტუდენტების სტატუსი ჩვეულებრივ აღუდგებათ“.

შეგახსენებთ, რომ სამცხე-ჯავახეთის სახელმწიფო სასწავლო უნივერსიტეტის ის 10 სტუდენტი, რომელთა ოჯახებიც გასული წლის ივლისში სეტყვამ დააზარალა, სწავლის ღირებულების დაფარვას სახელმწიფოსგან სასწავლო წლის ბოლომდე ელოდნენ. 5 ივნისს კი შეიტყვეს, რომ მთავრობა მათ დახმარებას არ აპირებდა და თითოეულ მათგანს სწავლის საფასური თავად უნდა გადაეხადა.

[თამუნა უჩიძე, ახალციხე]