სამცხე-ჯავახეთის უნივერსიტეტში სტატუსი 29 სტუდენტს შეუჩერდა

სამცხე-ჯავახეთის სახელმწიფო სასწავლო უნივერსიტეტის რექტორის მოადგილე ნიკოლოზ ახალკაცი განმარტავს, რომ უნივერსიტეტში სასწავლო და სოციალური გრანტებით სტუდენტების 15-20 პროცენტი ფინანსდება. მისივე თქმით, სტუდენტებისთვის სტატუსის შეჩერება თანხის გადაუხდელობითაა გამოწვეული.

„მოგეხსენებათ ჩვენი რეგიონის სირთულე, ჩვენი მოსახლეობის სოციალურ-ეკონომიკური მდგომარეობა, ამიტომაც არის, რომ სტუდენტები დათქმულ დროში ვერ ფარავენ სასწავლო თანხას. ჩვენ შემუშავებული გვაქვს ისეთი მექანიზმი, რომ რაც შეიძლება გავუადვილოთ სტუდენტებს სწავლის საფასურის გადახდის პროცესი“, - განმარტავს ნიკოლოზ ახალკაცი და ამატებს, რომ სტუდენტებს თანხის გადახდა სემესტრის განმავლობაში ეტაპობრივად შეუძლიათ: თუ სტუდენტმა თანხა ვერ გადაიხადა, სტატუსი უჩერდება და ძირითად გამოცდებზე აღარ დაიშვება“.

გასულ სასწავლო წელს სტუდენტის სტატუსი 170 სტუდენტს შეუჩერდა. ზაფხულის განმავლობაში დაახლოებით 80-მა პროცენტმა თანხის გადახდა შეძლო და აგვისტოში დამატებით გამოცდებზე გავიდა. რაც შეეხება მიმდინარე სასწავლო წლის შემოდგომის სემეტრს, 142 სტატუსშეჩერებული სტუდენტი იყო, თუმცა 113 მათგანს სტატუსი უკვე აღდგენილი აქვს.

„ძირითადი გამოცდებიდან დამატებით გამოცდებამდე, ზაფხულის განმავლობაში სამ თვემდე ვადას ვაძლევთ, მათ შეუძლიათ დაფარონ გადასახადი, აღიდგინონ სტატუსი და დამატებით გამოცდებზე გავიდნენ. ასევე ხდება შემოდგომის სემესტრიდან გაზაფხულის სემეტრში გადაყვანის დროს, მაგრამ ამ შემთხვევაში შედარებით ნაკლები დრო აქვთ“, - განმარტავს ახალკაცი.

ამ ეტაპზე სამცხე-ჯავახეთის სახელმწიფო სასწავლო უნივერსიტეტში პროფესიულ, საბაკალავრო და სამაგისტრო პროგრამებზე 1300-მდე სტუდენტია.

შეგახსენებთ,სტატუსშეჩერებული სტუდენტების თემა დღეს, 13 თებერვალს, "ერთიანმა ნაციონალურმა მოძრაობამ" წამოწია. მათი განცხადებით, 2013 წლის ოქტომბრიდან 2014 წლის თებერვლამდე, 4 თვეში, სტატუსშეჩერებული სტუდენტების რაოდენობამ 5520-ით მოიმატა.

[თამარ თოთაძე, ახალციხე]