'ერთად გადავრჩებით' -17 მაისს ლგბტ თემი ონლაინ დემონსტრაციას გამართავს

„მაშინ, როდესაც ადამიანები დგანან პანდემიის გამოწვევის წინაშე, მრავალმა მათგანმა დაკარგა შემოსავლის წყარო და შიმშილობის ზღვარზეა, ჩნდება კითხვა: არის კი ახლა ადამიანის უფლებებისთვის ბრძოლის დრო?! სწორედ ასეთ კრიზისულ ვითარებაში მეტად მწვავდება საზოგადოებაში არსებული უთანასწორობა და ჩაგვრა და ამიტომაც სწორედ ახლაა ადამიანის უფლებებისათვის ბრძოლის დრო.

საპროტესტო აქციების გამართვა აკრძალულია, ჩვენ გიწვევთ ონლაინ დემონსტრაციაზე 17 მაისს, 18:00 საათზე“,-ნათქვამია Tbilisi Pride-ის გვერდზე არსებულ განცხადებაში.

მათივე თქმით, შეხვედრას ლგბტ თემის წევრები, აქტივისტები, მხარდამჭერები, პოლიტიკოსები, ხელისუფლებისა და საერთაშორისო ორგანიზაციების წარმომდადგენლები დაესწრებიან და თემის წინაშე არსებულ გამოწვევებზე ისაუბრებენ.

17 მაისი ჰომოფობიასა და ტრანსფობიასთან ბრძოლის საერთაშორისო დღეა. პირველად ეს დღე 2003 წელს აღნიშნეს, როგორც ჰომოფობიასთან და ტრანსფობიასთან ბრძოლის დღე. 2006 წლიდან ის საერთაშორისო დღედ იქცა.

2014 წელს 17 მაისი მსოფლიოს 130 ქვეყანაში აღინიშნა. მათ შორის იყო ის 37 ქვეყანა, სადაც ჰომოსექსუალობა ლეგალიზებული არაა. ამ დღეს გაიმართა 1 600 ღონისძიება, რომელშიც 1 280 ორგანიზაცია იყო ჩართული.

საქართველოში ამ დღის აღნიშვნა პირველად 2012 წელს დაიგეგმა, თუმცა, მსვლელობას სასულიერო პირებმა და მრევლის ნაწილმა ხელი შეუშალა. მას შემდეგ ლგბტ აქტივისტები ხშირ შემთხვევაში 17 მაისის აღნიშვნას ვერ ახერხებენ, მიზეზად სამოქალაქო დაპირისპირების მოწყობის საფრთხეს ასახელებენ.

2014 წელს 2 მაისს, საქართველომ ანტიდისკრიმინაციული კანონი მიიღო. ამავე წლის 17 მაისიდან ყოველ წელს თბილისში მართლმადიდებელი ეკლესიის წინამძღვრები მრევლთან ერთად „ოჯახის სიწმინდის დღეს“ აღნიშნავენ და მსვლელობას აწყობენ.

[sknews.ge]