ახალციხის ‘ცხელების ცენტრში’ 10 პაციენტის ანალიზის პასუხი ცნობილია

როგორც, კლინიკის დირექტორი, გიორგი ბარძიმაძე ამბობს, პაციენტებთან ერთად, მედპერსონალის შემოწმებაც მიმდინარეობს და ამ დროისთვის გაგზავნილი ყველა პასუხი უარყოფითია.

ამ ეტაპზე კლინიკაში შვიდი პაციენტია, აქედან ექვსს უკვე აუღეს ანალიზი, პასუხები ხვალ, ხუთ მაისს გახდება ცნობილი.

„ჩვენთან ახლა შვიდი პაციენტია, ექვსის ანალიზები უკვე გადავაგზავნეთ. მეშვიდე ახლა შემოგვემატა და მასაც ავუღებთ“, - განაცხადა გიორგი ბარძიმაძემ.

ამ დროისთვის ცარიელია აბასთუმნის ფილტვის ცენტრი, რომელიც მიმდინარე თვეში „ცხელების ცენტრად“ გადაკეთდა. ასევე არ ჰყავთ ცხელებიანი პაციენტები ბორჯომის რეფერალურ ჰოსპიტალშიც.

კორონავირუსის პირველი შემთხვევა სამცხე–ჯავახეთში 16 აპრილს დაფიქსირდა, ინფექცია ახალდაბაში მცხოვრებ ახალგაზრდას დაუდასტურდა. 23 აპრილს კორონავირუსი დაუდგინდა ბორჯომის "ცხელების ცენტრში" მყოფ კიდევ ერთ პირს, რომელიც დაწესებულებაში ბაკურიანის საკარანტინო სივრციდან შეიყვანეს.

25, 29 და 30 აპრილს COVID-19 დაუდასტურდა ახალციხის "ცხელების ცენტრში" მყოფ სამ პაციენტს, ისინი ახალციხის საკარანტინო ზონიდან შეიყვანეს.

ოთხი მაისის მონაცემებით, სამცხე–ჯავახეთში კორონავირუსით ინფიცირების ხუთი შემთხვევაა გამოვლენილი, აქედან ერთი ადგილობრივია, ოთხი კი საქართველოს სხვადასხვა რეგიონის მცხოვრები.

[ნუკა სტეფნაძე, ახალციხე]