ახალციხის ‘ცხელების ცენტრში’ კორონავირუსის მეხუთე შემთხვევა დაფიქსირდა

როგორც, კლინიკის დირექტორი გიორგი ბარძიმაძე ამბობს, პაციენტს, რომელსაც ვირუსი დაუდასტურდა, საზღვარგარეთ მოგზაურობის ისტორია აქვს.

„კორონავირუსი გუშინ, 28 მაისს დაფიქსირდა, პაციენტი მაშინვე გადავიყვანეთ კოვიდცენტრში, იგი ჩვენი რეგიონის მკვიდრი არ არის“ – ამბობს გიორგი ბარძიმაძე.

კორონავირუსის პირველი შემთხვევა სამცხე–ჯავახეთში 16 აპრილს დაფიქსირდა, ინფექცია ახალდაბაში მცხოვრებ ახალგაზრდას დაუდასტურდა. 23 აპრილს კორონავირუსი დაუდგინდა ბორჯომის "ცხელების ცენტრში" მყოფ კიდევ ერთ პირს, რომელიც დაწესებულებაში ბაკურიანის საკარანტინო სივრციდან შეიყვანეს.

25, 29, 30 აპრილს და 7 მაისს COVID-19 დაუდასტურდა ახალციხის "ცხელების ცენტრში" მყოფ ოთხ პაციენტს, ისინი ახალციხის საკარანტინო ზონიდან შეიყვანეს.

29 მაისის მონაცემებით, სამცხე–ჯავახეთში კორონავირუსით ინფიცირების შვიდი შემთხვევაა გამოვლენილი, აქედან ერთი ადგილობრივია, ექვსი კი საქართველოს სხვადასხვა რეგიონის მცხოვრები.

[რიმა სარუხანიან, ახალციხე]