ახალციხის მუნიციპალიტეტში აუდიტი შევა

როგორც სახელმწიფო აუდიტის სამსახურში განმარტეს, წლიურ გეგმაში ეს პროცესი ჩანიშნულია, თუმცა პანდემიის გამო, აუდიტორებს ობიექტებზე სიარული არ შეუძლიათ, ამიტომ პროცესი დაიწყება საგანგებო მდგომარეობის დასრულების შემდეგ.

„ეს გეგმური აუდიტია, წლის ბოლოს დამტკიცებულ გეგმაშიც გვიდევს, შესაძლოა რაიმე დოკუმენტი გამოითხოვეს, მაგრამ რაკი პანდემიაა, ამის გამო შეფერხებულები ვართ. ჯერ ოფიციალურად არ არის დაწყებული აუდიტორული პროცედურა. როცა საგანგებო ვითარება დასრულდება, ჩვეულებრივი ოფიციალური პროცედურები დაიწყება“, - განმარტავს სახელმწიფო აუდიტის სამსახურის საზოგადოებასთან ურთიერთობის სამსახურის წარმომადგენელი, ტატა გამყრელიძე.

კონკრეტულად რომელ თვეშია ჩანიშნული პროცედურა და შეაფერხა თუ არა მისი დაწყება პანდემიამ, გამყრელიძე გვპასუხობს, რომ ეს მხოლოდ იმ დეპარტამენტისთვის არის ცნობილი, რომელიც აუდიტის ობიექტზე შედის: "წლის გეგმა თვეების მიხედვით იმ დეპარტამენტებს აქვთ გაწერილი, რომლებიც უშუალოდ აუდიტის ობიექტებზე შედიან, თუმცა წლის გეგმაში, რომელიც ვებგვერდზე ქვეყნდება, ობიექტების შემოწმების გეგმა თვეების მიხედვით ჩაშლილი არ არის. ამის ვალდებულება არ გვაქვს".

მისივე თქმით, მუნიციპალიტეტებში სახელმწიფო აუდიტი გეგმის მიხედვით, ორ-სამ წელიწადში ერთხელ შედის: „სამწუხაროდ, დეპარტამენტს არ გააჩნია იმდენი ადამიანური რესურსი, რომ ყველა ობიექტის შემოწმება ყოველწლიურად შეძლოს, ამდენად საშუალოდ 2-3 წელიწადში ერთხელ უწევთ თითო ობიექტზე აუდიტის ჩატარება“.

ახალციხის საკრებულოს წევრი და ფრაქცია "ქართული ოცნება-მწვანეების" თავმჯდომარე თამარ გოგოლაძე ამბობს, რომ უკვე წლებია მუნიციპალიტეტის ტენდერებთან დაკავშირებით უწყებაში აუდიტის შესვლას ითხოვს. „სამხრეთის კარიბჭესთან“ საუბარში გოგოლაძე განმარტავს, რომ საეჭვო ტენდერების საკითხი არაერთ სხდომაზე დააყენა.

ახალციხის მუნიციპალიტეტის ტენდერებს იკვლევს სახელმწიფო უსაფრთხოების სამსახურიც.
სუს–ი ამ საკითხით მას შემდეგ დაინტერესდა, რაც „საერთაშორისო გამჭვირვალობა - საქართველომ“ კვლევა გამოაქვეყნა.

კვლევის მიხედვით, 2014-2020 წლებში ახალციხის მერის ძმამ და რძალმა ახალციხის ბიუჯეტიდან 565 710 ლარი მიიღეს.

არასამთავრობო ორგანიზაცია მოუწოდებს სახელმწიფო უსაფრთხოების სამსახურის ანტიკორუფციულ სააგენტოს და გენერალურ პროკურატურას, შეისწავლოს შპს „ნუკიასა” და ნანა მაისურაძის მიერ მოგებული თითოეული შესყიდვა და დაადგინოს, იყო თუ არა ეს შესყიდვები მათთვის სასურველი პირობებით გამოცხადებული და ჰქონდა თუ არა ადგილი კორუფციის შესაძლო შემთხვევებს.

გარდა აღნიშნულისა, ახალციხის მერის კომპანიების მიერ 2015-2019 წლებში მოგებული ტენდერების შესახებ უწყებაში გამოძიება სამსახურეობრივი უფლებამოსილების ბოროტად გამოყენების მუხლით მიმდინარეობს.

[თაკო ფეიქრიშვილი, ახალციხე]