ახალციხის მერთან დაკავშირებული კომპანიების საეჭვო ტენდერები – 'გამჭვირვალობის' კვლევა

არასამთავრობო ორგანზიაცია „საერთაშორისო გამჭვირვალობა საქართველომ“ კვლევა დღეს, 15 ივლისს გამოაქვეყნა. მასში აღნიშნულია, რომ ზაზა მელიქიძესთან დაკავშირებული კომპანიები, მის გამგებლად არჩევამდე, ანუ 2015 წლამდე, ახალციხის მუნიციპალიტეტის ტენდერებში არ მონაწილეობდნენ.

„2015 წელს, გაიზარდა ამ კომპანიებთან გაფორმებული პირდაპირი შესყიდვების რაოდენობაც - 21 შესყიდვიდან 11-ში კონტრაქტორები სწორედ ახალციხის მუნიციპალიტეტის იურიდიული პირები არიან“.

კვლევის მიხედვით, ზაზა მელიქიძესთან დაკავშირებულმა კომპანიებმა „მელიზამ” და „მესხეთი XXI”-მა, 2015-2019 წლებში 15 ტენდერი მოიგეს, მათ შორის, ყველაზე მეტი, რვა ტენდერი – 2016 წელს.

საერთო ჯამში, მათ მიერ მიღებულმა თანხამ 528 123 ლარი შეადგინა, საიდანაც 514 341 ლარი ახალციხის გამგეობა/მერიისა და მათი შპს/ა(ა)იპებ-ისგან მიღებული თანხებია.

კვლევაში ნათქვამია, რომ, მერად არჩევის შემდეგ, ზაზა მელიქიძემ კუთვნილ კომპანიებში დირექტორებად საკუთარი ცოლის და და ცოლის ძმა დანიშნა. მისი კომპანიის ყოფილი ფინანსური მენეჯერი კი მერიაში პირველ მოადგილედ აიყვანა.

„შპს „მელიზას“ 100% წილს ზაზა მელიქიძე დღემდე თავად ფლობს. კომპანიის დირექტორად მას ცოლის ძმა, ხვიჩა ალავიძე ჰყავს დანიშნული, „მელიზას” ოფისის მენეჯერად კი – მეუღლე ასმათ ალავიძე.

„მესხეთი XXI”-ს, მელიქიძის გამგებლად არჩევამდე, მხოლოდ - ერთი – 60 ლარის გამარტივებული შესყიდვა ჰქონდა „საქართველოს გაერთიანებული წყალმომარაგების კომპანიისგან“. მელიქიძის გამგებლად არჩევის შემდეგ კი, „მესხეთი XXI”-მ მონაწილეობა 20 ტენდერში მიიღო, აქედან 16 ახალციხის გამგეობა-მერიამ გამოაცხადა.

ზაზა მელიქიძემ შპს „ლეგი” ახალციხეში, საფარის ქუჩის N3-ში, 2005 წლის ივლისში დაარეგისტრირა. კომპანიის საკუთრებაში 4 216 კვმ მიწაა, რაზეც ლუდისა და ლიმონათის ყოფილი ქარხნის შენობა დგას.

მას შემდეგ, რაც ზაზა მელიქიძე გამგებელი გახდა, „ლეგის” დირექტორად ცოლის და, თეონა ალავიძე დანიშნა, 100% წილის მმართველად კი ისევ თვითონ დარჩა“, - ვკითხულობთ მასალაში.

ორგანიზაციაში მიიჩნევენ, რომ ჩნდება „კითხვის ნიშნები ზაზა მელიქიძის ქონებრივ დეკლარაციასთან დაკავშირებითაც“.

კვლევის შედეგებიდან გამომდინარე, „საერთაშორისო გამჭვირვალობა საქართველო“ მოუწოდებს სახელმწიფო აუდიტის სამსახურს - „შეისწავლოს ახალციხის მუნიციპალიტეტისა და იურიდიული პირების მიერ განხორციელებული ის შესყიდვები, სადაც მუნიციპალიტეტის მერთან დაკავშირებულმა კომპანიებმა გაიმარჯვეს“;

არასამთავრობო ორგანიზაცია მიმართავს საჯარო სამსახურის ბიუროსაც - „დაიწყოს მოკვლევა ზაზა მელიქიძის ქონებრივ დეკლარაციაში აღმოჩენილ ხარვეზებთან დაკავშირებით“.

[sknews.ge]