სუს–მა ახალციხის მერის მრჩეველის კომპანიების მიერ მოგებული ტენდერების საქმის შესწავლა დაიწყო

„შეგიძლიათ დაწეროთ, რომ შესწავლა დაწყებულია“, – ანტიკორუფციული სააგენტოს წარმომადგენელმა „სამხრეთის კარიბჭესთან“ განაცხადა.

„საერთაშორისო გამჭვირვალობა - საქართველოს” კვლევის მიხედვით, ინფრასტრუქტურის საკითხებში ახალციხის მერის ზაზა მელიქიძის მრჩევლის გელვასი გელაძის კომპანია „მშენებელი 2004“ ახალციხის მუნიციპალიტეტების ტენდერებს უკონკურენტოდ იგებს.

2014 წლიდან დღემდე, ანუ მას შემდეგ, რაც გელაძე თვითმმართველობაში თანამდებობაზე დაინიშნა, მისი კომპანიის შემოსავლებმა 4 096 286 ლარი შეადგინა, საიდანაც 1 103 065 ლარი (დაახლოებით 27%) „მშენებელი 2004”-ს ახალციხის მუნიციპალიტეტების შესყიდვებიდან დაერიცხა. ამ თანხის ნახევარზე მეტი - 651 420 ლარი უკონკურენტოდ მოგებული ტენდერებით მიიღო. გელვასი გელაძე ერთდროულად იყო, სატენდერო და მიღება-ჩაბარების (დღემდე რჩება) კომისიების წევრიც, მიმდინარე პროექტების ზედამხედველიც და სამუშაოების შემსრულებელიც.

შეგახსენებთ, რომ ანტიკორუფციულმა სააგენტომ შესწავლის შემდეგ, გამოძიება დაიწყო ახალციხის მუნიციპალიტეტის მერთან დაკავშირებული კომპანიების მიერ მოგებულ ტენდერებზე, გამოძიება სამსახურეობრივი უფლებამოსილების ბოროტად გამოყენების მუხლით მიმდინარეობს.

[თორნიკე ზაზაძე, ახალციხე]