‘ზოგჯერ პურის ფულიც არ გვაქვს’ - მთავრობის სუბსიდიის გარეშე დარჩენილი მოქალაქეები

ლ.ბ 35 წლისაა, მეუღლე 39-ის. ამბობს, რომ ბოლო ორი თვეა პურის საყიდელი ფულიც კი არ აქვთ.

ოჯახმა ვერ ისარგებლა მთავრობის სუბსიდიით, რადგან ლ.ბ არ მუშაობს, მისი ქმარი კი თვითდასაქმებულია: „ძალიან მინდოდა ჩვენც დაგვხმარებოდნენ. მაგრამ ჩემი მეუღლე ხელოსანია, როცა მეზობელს ან ვინმეს დასჭირდება რემონტი, ან რამის აშენება მაშინ მიდის და მუშაობს. საბუთი სჭირდება, რომ დაგეხმარონო და ასეთ საბუთს ვინ მოგვცემს. გაგვიჭირდა ამ ზამთრის გატანა, ნოემბრის მერე არ უმუშავია და ვზივართ მშივრები“, - ამბობს იგი.

მისივე თქმით, სამსახურის დაწყება თავადაც სცადა, მაგრამ სოფელში სამუშაოს პოვნა გაუჭირდა, ახალციხეში კი 150 ლარი შესთავაზეს, რომელიც როგორც ამბობს გადაადგილებაშიც არ იქნება საკმარისი: „მრცხვენია, რომ ახალგაზრდები ვართ და ვერ ვმუშაობთ. მაგრამ ახალციხეში რომ წავიდე 150 ლარს მაძლევენ და ეს ფული გზაში არ მეყოფა. მთელი ზამთარი გაზაფხულს ველოდებოდით, რომ ჩემს ქმარს მაინც დაეწყო სამუშაო და ესეც არ გამოვიდა. სულ ვალები და ნისიები მაქვს, არც კი ვიცი სადამედე უნდა მივაღწიოთ ასე“.

მას არც მცირეწლოვანი შვილი ჰყავს და არც პენსიონერი ოჯახის წევრი: „მარტო მე და ჩემი ქმარი ვცხოვრობთ. შვილი არ გვყავს და ვერც ექიმთან მივდივარ, რომ გავიგო რა პრობლემაა. ხშირად პურის ფულიც კი არ გვაქვს და რა დროს ექიმია?!“, ამბობს 35 წლის ქალი და ამატებს, რომ ცოლ-ქმარმა წელს დროებით აღებული მიწის ნაკვეთის დამუშავებაც ვერ მოახერხა, რადგან სათესლე კარტოფილი ძვირი ღირდა. არ ჰყავთ არც შინაური პირუტყვი.

ლ.ბ ამბობს, რომ სოციალური დახმარება არ აქვთ: „არ ვართ სოციალურად დაუცველები, მაგრამ მინდა რომ შევიტანო განაცხადი და დაითვალონ ჩვენი ქულები, იმიტომ, რომ დახმარება ნამდვილად გვჭირდება. არც სამსახური გვაქვს და არც რამე ისეთი, რომელიც შემოსავალს მოგვიტანს. ვზივართ მშივრები“.

მთავრობის ანტიკრიზისული გეგმის მიხედვით, მოქალაქეები, რომლებიც ფიზიკურ პირთან არიან დასაქმებული, დახმარებას, ყოველთვიური 300 ლარის ოდენობით ვერ მიიღებენ, რადგან შესაბამისი საბუთი სჭირდებათ.

"ფიზიკურ პირებთან მომუშავე ადამიანები სამწუხაროდ ვერ მიიღებენ დახმარებას, იქიდან გამომდინარე, რომ ფიზიკური პირის მიერ მიღებული დადასტურება ვერ იქნება საკმარისი. იურიდიული პირის მიერ უნდა იყოს ცნობა აუცილებლად გაცემული. იმ შემთხვევაში თუ მძღოლად მუშაობდა ან ტაქსის მძღოლი იყო, ლიცენზია იქნება საკმარისი. თუმცა თუ ის მძღოლად მუშაობდა ოჯახში, ოჯახის წერილი სამწუხაროდ არ იქნება საკმარისი," - განაცხადა 27 აპრილს ჯანდაცვის მინისტრის მოადგილე თამარ ბარკალაიამ.

მთავრობის სუბსიდიის მისაღებად, მოქალაქე ან იურიდიულ პირთან უნდა იყოს დასაქმებული, ან სოციალურად დაუცველთა მონაცემებს აკმაყოფილებდეს.



[თაკო ფეიქრიშვილი, ახალციხე]