სამცხე–ჯავახეთის სატყეო სამსახურის უფროსის მოვალეობას სოსო რეხვიაშვილი ასრულებს

ეროვნული სატყეო სააგენტოს სამცხე-ჯავახეთის სატყეო სამსახურის ყოფილმა უფროსმა თემურ გელდიაშვილმა თანამდებობა 19 ნოემბერს საკუთარი განცხადების საფუძველზე დატოვა. ამ დრომდე უფროსის მოვალეობას ირაკლი მუკნიაშვილი ასრულებდა.

სოსო რეხვიაშვილი დროებით მოვალეობის შემსრულებლად სამი თვის ვადით დაინიშნა, რომელიც აღნიშნულ სტრუქტურაში 2006 წლიდან მუშაობს.

"2006 წლიდან სატყეო სამსახურში ვმუშაობ, ვიყავი ადიგენის უბნის უფროსი, სადაც დაახლოებით ორი–სამი წელი ვიმუშავე, მერე ადიგენის გამგეობის ინფრასტრუქტურის სამსახურში გადავედი, შემდეგ ისევ ადიგენის სატყეოში დავბრუნდი უბნის უფროსად, ამის შემდეგ ახალციხის უბნის უფროსად გადმომიყვანეს და ახლა სამცხე–ჯავახეთის სატყეო სამსახურის უფროსის მოვალეობის შემსრულებლად დავინიშნე", – ამბობს სოსო რეხვიაშვილი.

სოსო რეხვიაშვილი 1963 წლის 22 სექტემბერს ადიგენის რაიონში დაიბადა. სწავლობდა სოფელ მოხის საშუალო სკოლაში. დამთავრებული აქვს სამტრედიის ზოოვეტერინარული ტექნიკუმი და სოხუმის უნივერსიტეტი. მუშაობდა სხვადასხვა სამსახურში. რამდენიმე წლის განმავლობაში სოფელ მოხის რწმუნებული იყო, რის შემდეგაც მუშაობა სატყეო სამსახურში გააგრძელა.

[თამარ თოთაძე, ახალციხე]