ახალციხის ‘ცხელების ცენტრში’ კორონავრუსის მესამე შემთხვევა დაფიქსირდა

"ცხელების ცენტრიდან" გუშინ, 29 აპრილს ლუგარის ლაბორატორიაში 27 პირის ანალიზი გადააგზავნეს, 14 პაციენტის და 13 სამედიცინო პერსონალის.

აქედან კორონავირუსი მხოლოდ ერთს, 30 წლამდე კაცს დაუდასტურდა, რომელსაც რუსეთში მოგზაურობის ისტორია აქვს.

"ინფიცირებული ამ ეტაპზე ჩვენს კლინიკაში იმყოფება, გამოძახებული გვყავს კატასტროფის ჯგუფი და სავარაუდოდ გორის ჰოსპიტალში გადაიყვანენ", – აცხადებენ სამედიცინო დაწესებულებაში.

მათივე ინფორმაციით, ჯანდაცვის სამინისტროს პროტოკოლის მიხედვით, სამედიცინო პერსონალი ორკვირაში ერთხელ, გეგმიურად მოწმდება კორონავირუსზე. დღევანდელი მონაცემებით, ახალციხის "ცხელების ცენტრში" ტესტირება ჩაუტარდა სულ 35 თანამშრომელს.

კორონავირუსის პირველი შემთხვევა სამცხე–ჯავახეთში 16 აპრილს დაფიქსირდა, ინფექცია ახალდაბაში მცხოვრებ ახალგაზრდას დაუდასტურდა. 23 აპრილს კორონავირუსი დაუდგინდა ბორჯომის "ცხელების ცენტრში" მყოფ კიდევ ერთ პირს, რომელიც დაწესებულებაში ბაკურიანის საკარანტინო სივრციდან შეიყვანეს.

25 და 29 აპრილს COVID-19 დაუდასტურდა ახალციხის "ცხელების ცენტრში" მყოფ ორ პაციენტს, ისინი ახალციხის საკარანტინო ზონიდან შეიყვანეს.

30 აპრილის მონაცემებით, სამცხე–ჯავახეთში კორონავირუსით ინფიცირების ხუთი შემთხვევაა გამოვლენილი, აქედან ერთი ადგილობრივია, ოთხი კი საქართველოს სხვადასხვა რეგიონის მცხოვრები.

საქართველოში გამოვლენილია კორონავირუსის 539 შემთხვევა. მათგან 178 უკვე გამოჯანმრთელდა. 6 გარდაიცვალა.

[sknews.ge]