სავაჭრო ობიექტების გახსნა სეს–ის რეკომენდაციებზე იქნება დამოკიდებული

ბექა ფერაძის განცხადებით, აპლიკაციის შევსების შემდეგ, გადამოწმდება აკმაყოფილებს თუ არა კომპანია, კორნავირუსის პრევენციის მიზნით დაწესებულ სტანდარტებს.

ეკონომიკის გახსნის მიზნით, 29 აპრილს, 18:00 საათზე, ჯანდაცვის სამინისტროს ოფიციალურ ვებ-გვერდზე კომპანიების რეგისტრაცია სპეციალური აპლიკაციის საშუალებით დაიწყება.

„მსურველებს დღეიდან შეუძლიათ აპლიკაციის შევსება. შემდეგ დარგობრივი უწყებები დაიწყებენ შემოწმებას. დღის ბოლოს იქნება შესაძლებელი ანალიზი გავკეთოთ და გვქონდეს შედეგები – განვსაზღვროთ რომელი კომპანია აკმაყოფილებდა მოთხოვნებს და რომელი არა“,– განაცხადა ბექა ფერაძემ.

სავაჭრო ობიექტები მუშაობის განახლებაზე, საბოლოო ნებართვას ჯანდაცვის სამინისტრო გასცემს.

შრომის პირობების ინსპექტირების დეპარტამენტში აცხადებენ, რომ 29 აპრილის მონაცემებით, 600 კომპანია შემოწმდა და მათგან 80%–მა შეძელო პირობების დაკმაყოფილება.

„ახალი მოდელის მეშვეობით ჩვენ ვფიქრობთ, რომ 1000–ზე მეტს შევამოწმებთ ყოველდღიურად. ეს მოგვცემს საშუალებას, რომ მაქსიმალურად შევამოწმოთ ის კომპანიები, რომლებიც ეკონომიკის გახსნასთან ერთად არიან მოლოდინის რეჟიმში. შესაბამისი დასკვნების საფუძველზე, მათ მიეცემათ საქმიანობის აღდგენის შესაძლებლობა“,–განაცხადა ბექა ფერაძემ.

მისი განმარტებით, რეკომენდაციების შესრულებას დიდი თანხა არ ჭირდება.

საგანგებო მდგომარეობით გამოწვეული შეზღუდვების მოხსნა, 27 აპრილიდან დაიწყო. პირველ ეტაპზე, შესაძლებელი გახდა ონლაინ ვაჭრობა, ავტომობილებით გადაადგილება და ღია ტიპის აგრალური ბაზრების ფუნქციონირება.

მთავრობის გათვლებით, თუ ეპიდსიტუაცია არ გაუარესდება 11 მაისიდან ქვეყანაში აღდგება სამშენებლო მასალების წარმოება, მუშაობას დაიწყებენ ავტოსამრეცხაოები, შესაძლებელი იქნება კომპიუტერების და პირადი საყოფაცხოვრებო საქონლის შეკეთება და სარეკრეაციო ზონების ფუნქციონირება.

ანტიკრიზისული გეგმის მიხედვით, სტაბილური ეპიდსიტუაციის შემთხვევაში მესამე ეტაპი მაისის ბოლოს უნდა დაიწყოს, რაც ნიშნავს იმას რომ გაიხსნება საცალო და საბითუმო მაღაზიები (გარდა დიდი სავაჭრო ცენტრების) ამავე ეტაპზე გაიხსნება დახურული ტიპის ბაზრობები და საგამომცემლო საქმიანობა.



[ნუკა სტეფნაძე]