'მკოიანის ძმიშვილის ციხიდან გამოსაშვებად თვითმმართველობის წარმომადგენლები ხელმოწერებს აგროვებენ'-ადგილობრივები

ნინოწმინდაში, სოფელ გორელოვკაში მცხოვრებმა გვითხრა, რომ ორი დღის წინ სოფლის დეპუტატი ანდრანიკ მკრტიჩიანი, სოფელში იყო მისული და ადგილობრივებს ხელმოწერას სთხოვდა.

„ქართული ოცნების დეპუტატი ანდრანიკ მკრტიჩინი იყო მოსული, რომ კარგი ახალგაზრდა ბიჭი გამოუშვან ციხიდან. მე არ მომიწერია ხელი სიმართლე გითხრათ, აი ძირითადად, ახლობლებმა და ნაცნობებმა მოაწერეს ხელი მარტო“,- გვითხრა ადგილობრივმა.

იგივეს გვიყვება ახალქალაქში, სოფელ ჩამდურას მცხოვრები. მისი თქმით ზოგ სოფელში მერიის წარმომადგენლები, თუ დეპუტატები იტყუებიან და ადგილობრივებს ეუბნებიან, რომ როგორც მკოიანის ძმიშვილის, ისე პეტროსიანის ციხიდან გამოსაშვებად აგროვებენ ხელმოწერებს.

„რამდენიმე დღის წინ იყო მოსული სოფლის სპეციალისტი, ვლადიმერ ჟანკოჩიანი. მივიდნენ თოთხამში, ბავრაში, აზავრეთში, ყველგან. ხელმოწერებს აგროვებენ, თან ტექსტი წერია რომ ეს ენძელ მკოიანის ძმისშვილი კარგი მოსწავლეა და სასამართლო პროცესამდე რომ გაათავისუფლონ ხელმოწერით“, - ამბობს ადგილობრივი.

მისივე თქმით, ეს ამბავი ახალქალაქის მერის მოადგილე, არმენ მარანგოზიანმაც იცის. თუმცა მარანგოზიანს რედაქციის კითხვა გაუკვირდა და თქვა, რომ მსგავსი რამ არ ხდება.

ამ ფაქტთან დაკავშირებით დეპუტატმა, ანდრანიკ მკრტიჩიანმა „სამხრეთის კარიბჭეს“ დასმული კითხვის შემდეგ მობილური გაგვითიშა.

დავუკავშირდით ასევე, საკრებულოს დეპუტატს, სუმბატ კიურეღიანს, რომელმაც განაცხადა, რომ ამის შესახებ არაფერი იცის.

ინციდენტი ახალქალაქის ცენტრში 26 მარტს, დაახლოებით 15:00 საათზე, ენზელ მკოიანის საცხოვრებელ სახლთან მოხდა. შემთხვევიდან რამდენიმე საათში ენზელ მკოიანი და სამველ პეტროსიანი სამცხე-ჯავახეთის პოლიციის დეპარტამენტში, გადაიყვანეს, სადაც მთელი ღამის განმავლობაში კითხავდნენ.

საქმეზე შსს–მ ძიება ჯგუფურად ჩადენილი დანაშაულისა და იარაღის მართლსაწინააღმდეგო შეძენა-შენახვა-ტარების მუხლებით დაიწყო. 29 მარტს კი სამველ პეტროსიანი და ენზელ მკოიანის ძმისშვილი დააკავეს.

ასევე ამ თემაზე ნახეთ:

რას ჰყვება ნინოწმინდა-ახალქალაქის მაჟორიტარი დეპუტატი, ენზელ მკოიანი ახალქალაქში მომხდარ დაპირისპირებაზე.

[მარიამ ბარძიმაძე,ახალქალაქი]