სამცხე–ჯავახეთში თვითიზოლაციაში და კარანტინში მყოფი პირების რაოდენობა გაიზარდა

თვითიზოლაციაში ყველაზე მეტი, ცხრა პირი ახალქალაქში იმყოფება, ასევე შვიდ პირს აკვირდებიან ასპინძაში, ახალციხეში კი ერთია.

როგორც, ასპინძის ჯანდაცვის ცენტრის ხელმძღვანელი, მზია პაპაშვილი ამბობს, თვითიზოლაციაში გადავიდნენ ის მოქალაქეები, რომლებიც საქართველოს იმ რეგიონებიდან ჩამოვიდნენ, სადაც კორონავირუსის შემთხვევებია დაფიქსირებული.

„ამ ეტაპზე შვიდი პირი გვყავს თვითიზოლაციაში, ესენი არიან ცხელი რეგიონებიდან ჩამოსულები. კონტაქტები არ ჰქონიათ არვისთან, უბრალოდ ვაკვირდებით, თავს კარგად გრძნობენ“,– განაცხადა მზია პაპაშვილმა.

ახალქალაქის ჯანდაცვის ცენტრში გვითხრეს, რომ თვითიზოლაციაში მყოფი პირების რაოდენობა ცხრამდე გაიზარდა: „ჩვენთან არის ცხრა. ორს თვითიზოლაციის პერიოდი 17 აპრილს უმთავრდება და დაგვრჩება შვიდი. ესენი თურქეთიდან შემოვიდნენ კარანტინი ბათუმში გაიარეს და ახლა სახლში იმყოფებიან თვითიზოლაციაში. ყველა მათგანის მდგომარეობა დამაკმაყოფილებელია, სიმპტომები არ აღენიშნებათ“.

რაც შეეხება ახალციხეს, თვითიზოლაციაში ერთი პირი იმყოფება, როგორც სამცხე–ჯავახეთის სამხარეო ადმინისტრაციაში განგვიმარტეს, იგი თავს კარგად გრძნობს და საეჭვო სიმპტომები არ აღენიშნება.

რეგიონის მასშტაბით შვიდი საკარანტინო სივრციდან ერთი ცარიელია, ხოლო დანარჩენ ექვში 365 პირია გადანაწილებული. ხუთი ახალციხეში ახალციხეში სასტუმრო „გრანდ პალასის“ ტერიტორიაზე რჩება, ხოლო დანარჩენი ბაკურიანშია. როგორც სამხარეო ადმინისტრაციაში გვეუბნებიან, არცერთ მათგანს COVID 19 – ის სიმპტომები არ აღენიშნება.

საქართველოში ახალი კორონავირუსის პირველი შემთხვევა 26 თებერვალს დაფიქსირდა.
31 მარტიდან ქვეყანაში საყოველთაო კარანტინია გამოცხადებული. იკრძალება სამზე მეტი პირის შეკრება, ხოლო 21:00 საათიდან დილის 06:00 საათამდე ქვეყანაში კომენდანტის საათი მოქმედებს.

დღეიდან ოთხ დიდ ქალაქში შესვლა და გასვალა 10 დღით აიკრძალება.
15 აპრილის მონაცემბით ქვეყანაში 306 დადასტურებული იფიცირების შემთხვევაა, აქედან 69 გამოჯანმრთელდა, ხოლო სამი მათგანი გარდაიცვალა.

[ნუკა სტეფნაძე, ახალციხე]