ბორჯომში 2 პაციენტს COVID 19-ზე ამოწმებენ

ბორჯომის სამედიცინო დაწესებულებაში აცხადებენ, ორივე პაციენტს ცხელება აღენიშნება.

„ველოდებით პასუხს ლუგარის ლაბორატორიიდან. ერთის გუშინ გადავაგზავნეთ, პაციენტს ინსულტი აქვს და ცხელებაც აღენიშნება, მეორე პაციენტს მარტო ცხელება აქვს, დღეს გავაგზავნეთ მისი ანალიზი“,–გვითხრეს ბორჯომის „ცხელების ცენტრში“.

რეგიონის მასშტაბით, „ცხელების ცენტრებში“ სულ ხუთი პაციენტია, აქედან ორი ბორჯომში, ორი ახალციხეში, ერთი კი ადიგენში.

გუშინ ლუგარის ლაბორატორიამ დაადასტურა, რომ ახალციხის „ცხელების ცენტრში“ მყოფ პაციენტებს კორონავირუსი არ აქვს.

რაც შეეხება ადიგენს, აქ ერთ პაციენტს აკვირდებიან. ექიმები ამბობენ, რომ საეჭვო სიმპტომები არ აქვს და ამ ეტაპზე ლაბორატორიულ გადამოწმებას არ საჭიროებს: „გუშინ შემოვიდა ერთი პაციენტი, რომელსაც სიმპტომები არ აქვს ისეთი, რომ ანალიზის ჩატარებას საჭიროებდეს, ასევე არ აქვს ინფიცირებლთან კონტატებიც, უბრალოდ აღენიშნება ტემპერატურა და ამიტომ მოთავსებულია ბოქსირებულ პალატაში“.

რეგიონებში „ცხელების ცენტრები“ გასულ კვირას მოეწყო. მათ შორის სამცხე–ჯავახეთის ოთხ მუნიციპალიტეტში.

ამ დროისთვის ქვეყანაში კორონავირუსით ინფიცირების 306 შემთხვევაა გამოვლენილი. აქედან 69 გამოჯანმრთელდა, ხოლო სამი გარდაიცვალა.

[ნუკა სტეფნაძე, ბორჯომი]