სამცხე–ჯავახეთში თვითოზოლაციასა და კარანტინში 201 ადამიანი დარჩა

თვითოზოლაციაში მყოფი 10 პირიდან ერთი ახალციხეშია, ჯანდაცვის ცენტრის ინფორმაციით, მას სავალდებულო თვითოზოლაციის ვადა 18 მარტს ამოეწურება.

თვითოზოლაციაში მყოფი პირების რაოდენობა სამით გაიზარდა ახალქალაქში. ჯანდაცვის ცენტრში განმარტავენ, რომ სამივე მათგანი სომხეთიდან დაბრუნდა, რის შემდეგაც სავალდებულო თვითიზოლაციაში გადავიდა.

ჯანდაცვის ცენტრების ინფორმაციით, არცერთ მათგანს covid-19-ის სიმპტომები არ აღენიშნება.

სიმპტომები არ აქვთ არც კარანტინში მყოფ პირებს. სამცხე–ჯავახეთის შვიდი საკარანტინო ზონიდან ერთი ცარიელია, ექვსში კი 191 ადამიანია განაწილებული. მათგან 9 ადამიანი დარჩა ახალციხეში, სასტუმრო „გრანდ პალასის“ ტერიტორიაზე. 182 კი ბაკურიანის სასტუმროებშია გადანაწილებული.

საქართველოში ახალი კორონავირუსის პირველი შემთხვევა 26 თებერვალს დადასტურდა. მას შემდეგ საქართველოს ყველა რეგიონში საკარანტინო ზონები მოეწყო, მათ შორის ერთ–ერთი პირველი იყო აბასთუმნის ფილტვის ცენტრი, რომელიც დღეის მდგომარეობით ცარიელია.

ქვეყანაში ამ დროისთვის 266 დადსტურებული შემთხვევაა აქედან 67 გამოჯანმრთელდა, სამი კი გარდაიცვალა.

ვირუსის გავრცელების გამო, 21 მარტიდან ქვეყანაში მოქმედებს საგანგებო მდგომარეობა, 31 მარტიდან კი საყოველთაო კარანტინი და ე.წ კომენდანტის საათი გამოცხადდა. დღის განმავლობაში იკრძალება სამზე მეტი ადამიანის შეკრება, 21:00– დან 06:00 საათამდე კი აკრძალულია გადაადგილება.

[რობი ზარიძე, ახალციხე]