კათოლიკე ეკლესიაში ბზობის წირვა მრევლის მონაწილეობის გარეშე აღევლინა [ფოტო/ვიდეო]

ფოტო: არლის წმ. იოსების სახელობის ეკლესია

ბზობის დღესასწაულზე მორწმუნეები იესო ქრისტეს იერუსალიმში შესვლის დღეს იხსენებენ. იგი აღდგომამდე ერთი კვირით ადრე აღინიშნება.

ტრადიციულად, კათოლიკე ეკლესიაში, ბზობის დღესასწაულს თან სდევს ბზის ან ზეთისხილის ტოტების კურთხევის რიტუალიც. თუმცა წელს, პანდემიის გამო, არც რიტუალსა და არც სადღესასწაულო წირვაში მრევლი არ მონაწილეობდა.

ქვეყნის მასშტაბით, ყველა ეკლესია გაიღო მორწმუნეების პირადი ლოცვისთვის, ტაძარში შესვლა ერთდროულად მაქსიმუმ სამ ადამიანს, 10-15 წუთით შეეძლო. მსურველებისთვის ეკლესიის ეზოში განთავსდა ნაკურთხი ბზისა და პალმის ტოტები, რომელთა წაღებაც შეეძლოთ.

ბზობის დღესასწაულისა და აღდგომის კვირის შესახებ, 4 აპრილს კათოლიკე ეკლესიის ეპისკოპოსმა ჯუზეპე პაზოტომ სპეციალური, რიგით მესამე დეკრეტი გამოსცა, სადაც ნათქვამია, რომ არა მხოლოდ ბზობის დღესასწაული, არამედ დიდი ხუთშაბათის, წითელი პარასკევისა და სააღდგომო ღამისთევის ღვთისმსახურებებიც მრევლის გარეშე აღევლინება.

„ბზობის კვირადღეს, (5 აპრილს) მსახურება ჩატარდეს სამრევლოს ტაძრებში, უფლის იერუსალიმში შესვლა აღინიშნოს მარტივი ფორმით, პროცესიის გარეშე. იკურთხოს ტოტები (პალმის, ზეთისხილის ან ბზის) კონდაკში მოცემული რიტუალით. ნაკურთხი ტოტები დარჩეს ეკლესიაში, ნაწილი კი გადატანილი იქნას იმ ტაძრებში, სადაც მსახურება არ ჩატარდება, რათა მორწმუნეებს შეეძლოთ მოსვლა ამ დღის ან დიდი კვირის განმავლობაში და შექუჩების გარეშე მათი წაღება“, - ნათქვამია ეპისკოპოსის დეკრეტში.

თბილისის საკათედრო ტაძარში აღვლენილი წირვისთვის თვალის მიდევნება მორწმუნეებს ეკლესიის ფეისბუქ გვერდის „sabamedia” -ს საშუალებით შეეძლოთ.

ასევე ეპისკოპოსის დეკრეტის საფუძველზე, 17 მარტიდან ეკლესიაში ზიარების წესი შეიცვალა, 20 მარტიდან კი ტაძრებში მრევლის მონაწილეობით წირვები შეწყდა.


პირდაპირი თბილისის საკათედრო ტაძრიდან


ფოტო: არლის წმ. იოსების სახელობის ეკლესიის წინამძღვარი ანდრეი გრაჩიკი




ფოტო: ვალის ღვთისმშობლის შობის სახელობის ეკლესია


ფოტო: ვალის ღვთისმშობლის შობის სახელობის ეკლესია

[თაკო ფეიქრიშვილი, ახალციხე]