ილია მეორემ მართლმადიდებელ მრევლს ბზობის დღესასწაული მიულოცა [Video]

მთავარი → საზოგადოება 24.04.2016

დღეს, 24 აპრილს მართლმადიდებელი სამყარო ბზობის ბრწყინვალე დღესასწაულს აღნიშნავს. საქართველოს კათოლიკოს პატრიარქმა ილია მეორემ სამების საკათედრო ტაძარში საზეიმო წირვა აღავლინა, მრევლს ბზობის დღესასწაული მიულოცა და ვნების შვიდეულში დაგეგმილი ღვთისმსახურების გრაფიკი გააცნო.

სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის და ბიჭვინთისა და ცხუმ-აფხაზეთის მიტროპოლიტის, უწმინდესის და უნეტარესის ილია მეორის თქმით, ორშაბათს, სამშაბათსა და ოთხშაბათს პირველშეწირული წირვა აღევლინება.

სამშაბათს, 26 აპრილს 18:00 საათზე დაიწყება შვიდგზის ზეთისცხება. ხუთშაბათს წირვას სრულიად საქართველოს კათოლიკოს-პატრიარქი აღავლენს და შესრულდება ფეხთა ბანვის წესი, ხოლო პარასკევს 14:00 საათზე გარდამოხსნის რიტუალი შესრულდება.

აღდგომის ბრწინვალე დღესასწაულთან დაკაშვირებით ლოცვა შაბათს აღევლინება, ხოლო საზეიმო ლიტანიობა 23:00 საათიდან დაიწყება.

მისი თქმით, აღდგომის ბრწყინვალე დღესასწაულამდე ერთი კვირა დარჩა და იგი ღმერთს შესთხოვს, რომ ამ ერთი კვირის განმავლობაში ღირსეულად მოვემზადოთ ამ დიდებული დღესასწაულის შესახვედრად.

თორმეტი საუფლო დღესასწაულიდან ბზობა ერთ-ერთი მთავარი დღესასწაულია. მართლმადიდებელი ეკლესია დიდმარხვის მეექვსე კვირა დღეს მაცხოვრის იერუსალიმში დიდებით შესვლას ზეიმობს, რომელიც ყოველთვის ბრწყინვალე აღდგომის წინა კვირა დღეს ემთხვევა.

ამ დღეს ქრისტიანები ტრადიციულად მიდიან ეკლესიაში, ესწრებიან წირვა-ლოცვას და ბზას აკურთხებენ. ერთი წლის განმავლობაში სახლში შენახული ბზა ამ დღეს სახლიდან გამოაქვთ, ეკლესიის ეზოში სპეციალურად გამოყოფილ ტერიტორიაზე ტოვებენ, ან "სუფთა" ადგილზე წვავენ.

დიდმარხვა წელს 14 მარტს დაიწყო და 1-ელ მაისს, უფლის აღდგომის ბრწყინვალე დღესასწაულზე დასრულდება.

[sknews.ge]