აჭარაში კორონავირუსით 20 ინფიცირებულია

NCDC- აჭარის სამმართველოს სამედიცინო პერსონალი, ფოტო: საქართველოს პარლამენტის ეროვნული ბიბლიოთეკა

„დღეს ჩვენ დამატებით მოვიძიეთ ქობულეთის კლასტერთან დაკავშირებული 40 კონტაქტირებული პირი. ესენი გახლავთ დაავადებულთან კონტაქტში მყოფი პირები. ოჯახური და სხვა კონტაქტები, არასამედიცინო პერსონალი. მათგან იქნა აღებული რვა ლაბორატორიული კვლევის ნიმუში და აქედან ექვსი დადასტურდა. შესაბამისად ჩვენ ქობულეთის კლასტერთან დაკავშირებული ექვსი ახალი შემთხვევა გვაქვს. აღნიშნული შემთხვევები გადმოყავთ ბათუმის კლინიკა „მედალფაში“, ამ ეტაპზე იქ გვყავს 14 ძველი და ორი ახალი დადასტურებული შემთხვევა“, – განაცხადა ნინო ნიჟარაძემ.

ნიჟარაძის განცხადებით, კლინიკა „მედალფაში“ მყოფი ერთი პაციენტის მდგომარეობა არის სტაბილურად მძიმე, ხოლო ერთი ახალი შეყვანილი პაციენტი ამ დროისთვის შედარებით საყურადღებოდ ითვლება.

მისი თქმით, ე.წ ქობულეთის კლასტერიდან დაავადებული პირები სხვადასხვა ასაკობრივ კატეგორიას მიეკუთვნებიან, ერთი მათგანი კი არასრულწლოვანია.

„როგორც იცით, ქობულეთის კლასტერთან კონტაქტში მყოფი 108 პირი იყო გუშინ. დღეს დაემატა 40 და ანუ 148 გახდა. ქობულეთის მუნიციპალიტეტის რამდენიმე სოფელთან გვაქვს ჩვენ საქმე, მათ შორის ქობულეთის ქალაქის ტერიტორიასთანც. ზოგადად მიმდინარეობს ყველა კონტაქტის მოძიება და ეს პროცესი არ დასრულებულა. ვინაიდან ყველა დადსტურებული შემთხვევის კონტაქტებს განვიხილავთ. შესაძლოა კიდევ გაიზარდოს კონტაქტირებულთა რაოდენობა, ასევე ლაბორატორიული კვლევის ნიმუშების რაოდენობაც გაიზრდება“, – აღნიშნა ნინო ნიჟარაძემ.

ასევე, ნიჟარაძის თქმით, გუშინ საკარანტინო სივრციდან ორი პირი, დედა–შვილი დაემატა, რომლებიც თბილისში გადაიყვანეს: „რამდენიმე ფაქტორის და მათი სურვილის გათვალისწინებით".

13:30 საათის მონაცემებით, აჭარაში 20 დადასტურებული შემთხვევაა, აქედან 16 კლინიკაში იმყოფება ხოლო ოთხის ტრანსპორტირება ამ ეტაპზე მიმდინარეობს.

საქართველოში, COVID 19–ით ინფიცირების 230 დადასტურებული შემთხვევა ფიქსირდება. მათგან სამი პაციენტი გარდაიცვალა, 54 კი გამოჯანმრთელდა. ამ დრომდე კარანტინის რეჟიმში რჩება 4 908 ადამიანი, სტაციონარში მეთვალყურეობის ქვეშ — 429.

დღევანდელი მონაცემებით, ინფიცირებული პაციენტებიდან 52 თბილისის ინფექციურ საავადმყოფოში მკურნალობს, აქედან შვიდის მდგომარეობა მძიმეა. 55 პაციენტია თბილისის პირველ საუნივერსიტეტო კლინიკაში.

ქვეყანაში COVID 19–ის პირველი შემთხვევა 2020 წლის 26 თებერვალს დაფიქსირდა.

[sknews.ge]