აჭარაში ინფიცირების კიდევ სამი შემთხვევა გამოვლინდა

სამივე ახალი შემთხვევა აჭარაში იმპორტირებულია. ორი მათგანი თურქეთის საზღვრიდან, ერთი კი ევროპიდან შემოვიდა. აჭარის ჯანდაცვის მინისტრის მოადგილის ნინო ნიჟარაძის განმარტებით, სამივეს მდგომარეობა საშუალო და მსუბუქი ხასიათისაა.

„რეგიონში დაგვემატა სამი დადასტურებული შემთხვევა. ამ ეტაპზე, გვყავს 12 კორონავირუსით ინფიცირებული, ისინი იმყოფებიან კლინიკა “მედალფაში“. სამივე 45 წლის ასაკამდეა და გადიან დიაგნოსტიკურ კვლევებს. ორი საკარანტინე სივრცეში იმყოფებოდა, ერთი კი პირდაპირ სასაზღვრო პუნქტიდან გადაიყვანეს ბათუმის ინფექციურ საავადმყოფოში“, - აცხადებს ნიჟარაძე.

მისივე თქმით, ერთი პაციენტი ევროპიდან, კერძოდ, ლონდონის რეისით არის ჩამოსული, ამ ეტაპზე კი იმ მგზავრების კონტაქტების მოძიება მიმდინარეობს, რომელთან ერთადაც მან იმგზავრა.

„ამ ეტაპზე, გვყავს საეჭვო შვიდი შემთხვევა, მათ ლაბორატორიული კვლევის შედეგებს ველოდებით დღის განმავლობაში”.

[sknews.ge]