ქართული წარმოების პირბადეების გაყიდვა იწყება – რა ფასად და სად შეიძენთ

ნათია თურნავას განმარტებით, პირბადეები საწყის ეტაპზე ოთხ სააფთიაქო ქსელში გაიყიდება.

„დაახლოებით ორი დღე იქნება საჭირო, რომ მთელი საქართველოს მასშტაბით სააფთიაქო ქსელებში გადანაწილდეს ეს პირბადეები და საუბარი გვაქვს ჩვენ ავერსზე, ფარმადეპოზე, პსპ–სა და ჯპს–ზე. ეს ოთხი ქსელი არის ყველაზე ფართოდ წარმოდგენილი ქვეყნის მასშტაბით და მათთან თანამშრომლობით დავიწყეთ პირბადეების წარმოება და მოსახლეობისთვის მიწოდება. შაბათს უკვე ყველა ქსელში იქნება შესაძლებელი, ქართული წარმოების მრავალჯერადი პირბადეების შეძენა“.

მინისტრის განმარტებით, ერთი პირბადის წარმოება სახელმწიფოს ერთ ლარზე მეტი უჯდება, თუმცა სახელმწიფოს სუბსიდირებით მისი ყიდვა 50 თეთრად იქნება შესაძლებელი.

„იმისთვის რომ რაც შეიძლება მეტი ადამიანისთვის გახდეს პირბადე ხელმისაწვდომი, საწყის ეტაპზე ჩვენ შევთანხმდით რომ აფთიაქები თვითონ გააკონტროლებენ და დაარეგულირებენ რა რაოდენობა შეიძლება თითო მომხმარებელზე გაიცეს, იმიტომ რომ რაც შეიძლება მეტმა ადამიანმა შეძლოს და შეიძინოს“ – განაცხადა ნათია თურნავამ.

მისივე თქმით პირბადის გამოყენება, დელიკატური რეცხვის პირობებში რამდენიმე კვირის განმალობაშიც შეიძლება. პირველ ეტაპზე, ერთ ადამიანს სამი პირბადის ყიდვის შესაძლებლობა ექნება.

[რობი ზარიძე, ახალციხე]