საქართველოში მრავალჯერადი გამოყენების პირბადეების წარმოება დაიწყება

ქართული წარმოების პირბადეების შესახებ დღეს, 18 მარტს, ეკონომიკისა და მდგრადი განვითარების მინისტრმა ნათია თურნავამ განაცხადა. „პრემიერ-მინისტრის დავალებით და კერძო ბიზნესის ჩართულობით შევიმუშავეთ პროგრამა საქართველოში ადგილობრივი დამზადებით პირბადეების კერვისა და ახლა ვიწყებთ პირბადეების დამზადებას საქართველოში. პირველი საწარმოა „აჭარა ტექსტილი“, და მე პირადად ჩავალ ფოთში, რათა პირველი პარტია პირბადეებისა ვნახო“.

მინისტრის თქმით, წარმოების პროცესში 10-მდე საწარმოა ჩართული, ასევე რამდენიმე კომპანია, რომელსაც შემოაქვს აუცილებელი ნედლეული.

„ადგილზე უკვე გავქვს საკმარისი ნედლეული, რომ პირველი პარტიები უკვე ვაწარმოოთ და ეს რაოდენობა იქნება შეძენილი სახელმწიფოს მიერ. ეს შექმნის იმ აუცილებელ მარაგს, რომელსაც ჩვენ შემდეგ კერძო სექტორთან ერთად გადავანაწილებთ იმ ადამიანებზე და იმ კონტიგენტზე, ვისაც ეს დღეს ყველაზე მეტად სჭირდება“, - განაცხადა თურნავამ.

მისივე განმარტებით, მრავალჯერადი გამოყენების პირბადეებს ექნებათ, გამოყენების ინსტრუქცია. შეთანხმებულია დაავადებათა კონტროლის ცენტრთან და ეყრდნობა ჯანდაცვის მსოფლიო ორგანიზაციის რეკომენდაციებს.

[sknews.ge]