დაგვიცავს თუ არა ვირუსისგან ქართული წარმოების პირბადეები

დღეიდან, 10 აპრილიდან საქართველოში დამზადებული პირბადეები ოთხ მსხვილ სააფთიაქო ქსელში (ავერსი, PSP, ფარმადეპო, GPC) მთელი საქართველოს მასშტაბით გაიყიდება. იგი მრავალჯერადი გამოყენებისაა და 50 თეთრი ღირს.

თუმცა დოლბანდის პირბადეების გამოჩენამ, სოციალურ ქსელებში საზოგადოების არაერთგვაროვანი დამოკიდებულება გამოიწვია. მათი ნაწილი მიიჩნევს, რომ ასეთი პირბადე მიკროშხეფებსაც და ბაქტერიებსაც ატარებს და მისი გაკეთებით დავირუსების შესაძლებლობა არ მცირდება.

საქართველოში წარმოებულ პირბადეებზე კომენტარი გააკეთეს დაავადებათა კონტროლის ეროვნულ ცენტრშიც. მათი ინფორმაციით, პირბადეებმა ცენტრში საკონტროლო შემოწმება გაიარა.

„გვაქვს დიდი დეპარტამენტი ბიოუსაფრთხოებისა და ბიოდაცვის, რომელიც სწორედ ამ ტიპის საკითხებზე მუშაობს, როგორი პირბადე უნდა ეკეთოს ადამიანს, როგორი ხალათი ეცვას. გელა გელაძე, შოთა ცანავა არიან ამ დარგის მაღალი ექსპერტები. მათ შეამოწმეს და დაწერეს, რომ საყოფაცხოვრებო მოხმარებისთვის ეს პირბადეები სავსებით მისაღებია, მრავალჯერადი მოხმარებისთვისაც. შეიძლება გარეცხვა ცხელ წყალში, დაუთოება. თუ მას სამედიცინო მიზნით გამოიყენებ, უნდა ერთჯერადად მოვიხმაროთ“, - განაცხადა ცენტრის ხელმძღვანელმა ამირან გამყრელიძემ.

კრიტიკას პასუხობს გამყრელიძის მოადგილე, პაატა იმნაძეც: „ეგეთი პირბადეებით შავ ჭირზე ვმუშაობდით წლები. ერთჯერადი პირბადეები საერთოდ არ არსებობდა. წაიკითხონ აშშ-ის CDC-ის რეკომენდაციებიც“, - განაცხადა პაატა იმნაძემ.

საქართველოს ეკონომიკისა და მდგრადი განვითარების სამინისტროს ინფორმაციით, საწყის ეტაპზე, 400 000 ერთეული პირბადე გაიყიდება.



[sknews.ge]