სამცხე–ჯავახეთში პირბადეები მხოლოდ ერთ სააფთიაქო ქსელში იყიდება

პირბადეები პსპ–ს ქსელში ოთხი დღის წინ შეიტანეს და მეორე დღესვე გაიყიდა. მარაგი დღეს შეავსეს თუმცა, რა ოდენობით, პსპ–ში არ გვეუბნებიან.

„გუშინ ტრანსპორტირების პრობლემა იყო. დღეს უკვე თამამად შეგიძლიათ შეძინოთ ჩვენს ქსელში რეგიონის მასშტაბით“,– განაცხადეს პსპ–ს საზოგადოებასთან ურთიერთობის სამსახურში.

ავერსში გვითხრეს, მიუხედავად იმისა, რომ თითო მომხმარებელზე, სამი პირბადე გაყიდეს, მარაგი საკმარისი არ აღმოჩნდა.

„დიდი მოთხოვნა იყო ჩვენ თითო მომხმარებელს სამ პირბადეზე მეტს არ ვაძლევდით. ახლა მარაგში საერთოდ არ გვაქვს. ველოდებით შემოტანას. შეკვეთილი გვაქვს 100 000 ცალი, მაგრამ რამდენი გადანაწილდება თქვენს რეგიონზე არ ვიცი. ხუთშაბათს სამცხე–ჯავახეთში არსებულ ჩვენს ყველა ქსელში იქნება“,–გვითხრეს ავერსში.

პირბადეები არ არის, არც ფარმადეპოში, როდის მომარაგდება ქსელი ამ ეტაპზე უცნობია: „დაგიკავშირდებით და შეგატყობინებთ“.

უცნობია როდის შეიტანენ პირბადეებს ჯიპისის აფთიაქებშიც: „ზუსტად არ ვიცი, ეტაპობრივად მარაგდება“.

ახალციხეში ქართული წარმოების პირბადეები შემოტანიდან ერთ დღეში სრულად გაიყიდა.

ეკონომიკის მინისტრის, ნათია თურნავას განცხადებით 400 000 ცალი, ქართული წარმოების პირბადე, ოთხ სააფთიაქო ქსელში გასული კვირის ბოლოს ჩაეშვა. ერთეულის ფასი მომხარებლისთვის 50 თეთრია, სახელმწიფოს კი 1 ლარი და 8 თეთრი უჯდება.

[ნუკა სტეფნაძე, ახალციხე]