თსსუ–ს პირველს საუნივერსიტეტო კლინიკაში 3 ახალშობილის პასუხს ელოდებიან

„ბოლო 24 საათის განმავლობაში შემოვიდა ერთი ინფიცირებული ქალი, რომელიც არის ორსული დაახლოებით 22 კვირის. მისი მდგომარეობა ამ ეტაპზე სტაბილურია, იმყოფება გინეკოლოგების და ინფექციონისტების მეთვალყურეობის ქვეშ,“ – ამბობს კლინიკის დირექტორი ლევან რატიანი.
თსსუ–ს პირველ საუნივერსიტეტო კლინიკაში იმყოფება 3 ახალშობილი, რომელთა მდგომარეობაც საეჭვოდ შეფასდა და მათ პასუხს ლუგარის ლაბორატორიიდან ელოდებიან.

„ჩემს კლინიკაში ამ ეტაპზე სულ არის სამი ახალშობილი, რომელთა მდგომარეობა მძიმეა, მაგრამ მართვადი. ახალშობილები ყველა შემოყვანილია სუნთქვის მწვავე უკმარისობით. მოგეხსენებათ, რომ არ არის აუცილებელი მათთან იყოს კორონავირუსული ინფექცია. სულ არსებობდა და იარსებებს დღენაკლული ახალშობილები, არამარტო ჩვენს ქვეყანაში, არამედ მთელს სამყაროში და მათ სჭირდებათ დახმარება. კიდევ ერთხელ ვამბობ, რომ შესაძლებელია არც დადასტურდეს კორონავირუსული ინფექცია. ვინაიდან დღესდღეისობით ჩვენს ქვეყანაში გამოცხადებულია წითელზონად მარნეული და ბოლნისი, აქედან გამომდინარე , როგორც საეჭვო შემთხვევა, ჩვილები გადმოიყვანეს ჩვენს კლინიკაში,“ – განუცხადა ჟურნალისტებს ლევან რატიანმა.

რატიანმა ასევე აღნიშნა, რომ ტარდება რამდენიმე პაციენტის განმეორებითი ტესტირება. პროტოკოლის მიხედვით თუ მათთან ტესტის პასუხი უარყოფითი იქნება, მათ შესაძლოა ხვალ საღამოს კლინიკა დატოვონ.

საქართველოში 27 მარტის მონაცემებით კორონავირუსის 81 შემთხვევაა დადასტურებული. 13 პაციენტი უკვე გამოჯანმრთელებულად მიიჩნევა. კარანტინის რეჟიმში 4 505 პაციენტი იმყოფება, ხოლო სტაციონალური მეთვალყურეობის ქვეშ 247. ქვეყანაში მოქმედებს საგანგებო მდგომარეობა, მარნეულისა და ბოლნისის მუნიციპალიტეტები ჩაკეტილია და გამოცხადებულია კარანტინის ზონებად.

[ნუკა სტეფნაძე, ახალციხე]