‘covid 19–ი მკვლელი არ არის’ - ლევან რატიანი

ლევან რატიანის განცხადებით, კლინიკაში მყოფი ორი ყველაზე მძიმე პაციენტის მდგომარეობა გაუმჯობესებულია და მათ აპარატიდან მოხსნიან.

„ერთი, რომელიც იყო კრიტიკული მდგომარეობით შემოსული, მწვავე რესპირატორული სინდრომით და ყველა გართულებით, რომელიც ამ დაავადებისთვის იყო დამახასიათებელი, ამ ეტაპზე, ომში მეტ-ნაკლებად გავიმარჯვეთ. პაციენტი გახდა კონტაქტური, ადექვატური და დღის ბოლომდე შესაძლებელია აპარატიდან მოიხსნას. მეორე პაციენტი, 80 წლის ქალი, რომელსაც აქვს გულის უკმარისობა, ასაკი, ჩატარებული კლინიკურ-ლაბორატორიული კვლევით, პარაკლინიკური კვლევებით, სუბიექტური და ობიექტური მონაცემებით, დადებითია მიღწეულია. ამ ეტაპამდე, ქალბატონი ცოცხალია, ვიტალური პარამეტრი უკეთესია. იმედია ასე გაგერძელდება და ისიც მოიხსნება აპარატიდან“.

მდგომარეობა გაუმჯობესებულია ამავე კლინიკაში მყოფი ორსულის შემთხვევაშიც, ნაყოფიც შეესაბამება ფიზიოლოგიურ მდგომარეობას: „ბოლო 24 საათი ცხელება არ ჰქონია, ზედა სასუნთქი გზებისათვის დამახასიათებელი სიმპტომატიკა არ ვლინდება. ყოველდღიურად ხდება ნაყოფის მონიტორინგი. ნაყოფი შეესაბამება ფიზიოლოგიურ მდგომარეობას და იმედი გვაქვს, რომ რამდენიმე დღეში ეს პაციენტიც დატოვებს კლინიკას გამოჯანმრთელებული“.

მისივე განცხადებით, კლინიკაში მოთავსებულ არცერთ ახალშობილს კოვიდ ინფექცია არ უდასტურდება და მათი მდგომარეობა მეტ-ნკლებად სტაბილურია.

კლინიკის თერაპიულ განყოფილებაში, ბოლო 24 საათის განმავლობაში ინფიცირებულ პაციენტებს ცხელება არ უფიქსირდებათ, ხოლო ბოლო 24 საათის განმავლობაში, ლუგარის ლაბორატორიიდან არცერთი დადებითი ტესტი არ მოსულა.

რატიანი მოსახლეობას სიმშვიდისკენ მოუწოდებს და აღნიშნავს, რომ სწორად მკურნალობის შემთხვევაში ინფექცია მკვლელი არ არის - „კოვიდი არ არის მკვლელი - ეს ამ ქალბატონის მაგალითიდანაც ჩანს, იგი იყო უმძიმესი, მწვავე რესპირატორიული სინდრომით. ორბიტული სიმსუქნით, გულის უკმარისობით, არტერიული ჰიპერტენზიით, ჭარბი წონით, ამ ეტაპზე მისი მდგომარეობა არის მკვეთრად გაუმჯობესებული. არანაირი გართულება არ ვლინდება“.

საუნივერსიტეტო კლინიკაში, ამ ეტაპზე, 77 პაციენტი განაგრძობს მკურნალობას, მათგან 17 ინფიცირებულია.

[თაკო ფეიქრიშვილი, ახალციხე]