სწრაფ ტესტებს პირველ რიგში მარნეულში გამოიყენებენ

„დღეს ჩვენ ველოდებით სპეცრეისს, რომელიც განხორციელდება ჩინეთიდან საქართველოში. მივიღებთ ორი ტიპის სწრაფ ტესტს. ერთ–ერთი იქნება იმის მსაგავსი, რომელიც უკვე არის საქართველოში და მოვახდენთ ჩვენი მარაგების კიდევ დამატებით შევსებას, ხოლო მეორე ტესტი არის სწრაფი, რომელიც პირველ და მეორე დღეს აიდენტიფიცირებს ორგანიზმში ვირუსის არსებობას და შესაბამისად ჩვენი გეგმა არის შემდეგი, რომ იქ სადაც ჩვენ ვთვლით, რომ არის რისკი ეპიდემიური აფეთქების, დავიწყებთ იმ მოსახლეობის გამოკვლევას. ამ ეტაპზე ეს რეგიონი შერჩეულია და ეს არის მარნეული. ეს მოგვცეს საშუალებას რეგიონში ეპიდემიის გარკვეულწილად შეკავების და დინამიურობის გაკონტროლების,“ – უთხრა ეკატერინე ტიკარაძემ ჟურნალისტებს.

სწრაფი ტესტების შემოტანასა და მიზნობრივ ტესტირებაზე მინისტრმა გუშინდელ ბრიფინგზეც ისაუბრა და განაცხადა, რომ ტესტებს ქვეყანაში ეტაპობრივად შემოიტანენ, ოთხშაბათიდან კი მიზნობრივი ტესტირების დაწყება გახდება შესაძლებელი.

საქართველოში 24 მარტის მონაცემებით კორონავირუსის 67 შემთხვევაა დადასტურებული. 9 პაციენტი უკვე გამოჯანმრთელებულად მიიჩნევა. კარანტინის რეჟიმში 4055 პაციენტი იმყოფება, ხოლო სტაციონალური მეთვალყურეობის ქვეშ 252. ქვეყანაში მოქმედებს საგანგებო მდგომარეობა, მარნეულისა და ბოლნისის მუნიციპალიტეტები ჩაკეტილია და გამოცხადებულია კარანტინის ზონებად.

[sknews.ge]