სამცხე-ჯავახეთში დამატებით სამი საკარანტინო ზონა მოეწყო

საკარანტინო ზონები ბაკურიანის ორ და ახალციხის ერთ სასტუმროში მოეწყო.

სამცხე-ჯავახეთის სახელმწიფო რწმუნებულის აპარატის უფროსის, გიორგი მიქელაძის განმარტებით, რეგიონის საკარანტინო ზონებში 330 იზოლიებული ოთახია. 243 ადამიანი უკვე იმყოფება კარანტინში.

კარანტინში მყოფ მოქალაქეებს სასტუმროს პერსონალი ემსახურება, ისინი უკვე გადაამზადეს, მათ სპეციალური აღჭურვილობით მიაქვთ საკვები იზოლირებულ ოთახებთან და მოქალაქეებს კართან უტოვებენ.

ერთ-ერთი ასეთი ზონა ახალციხეში, სადგურის მიმდებარედ არსებული სასტუმრო „grand palace“-ში მოეწყო. ამ ეტაპზე აქ 31 პირია. ისინი ძირითადად ნინოწმინდის საბაჟოს გავლით საქართველოში ჩამოსული მოქალაქეები არიან.

„მინდა აღვნიშნო რომ ყველა ის პირი, რომელიც განთავსებულია კარანტინში, არ აღენიშნებათ ვირუსის დამახასიათებელი სიმპტომები. მათ ემსახურებათ სასტუმროს პერსონალი, რომლებიც სადილს კართან უტოვებენ და მიდიან“,-გვითხრა მიქელაძე.

მისივე თქმით, კარანტინში მყოფი პირების კვებას და ასევე პერსონალის ხელფასს სახელმწიფოდან სპეციალურად გამოყოფილი თანხით აანაზღაურებენ.

მიქელაძე აღნიშნავს, რომ სასტუმროს მეპატრონეები, საკარანტინო ზონებისთვის ფართის დათმობის სურვილს თავად გამოთქვამენ.

„მიმდინარეობდა მოლაპარაკებები და ისე მოვამზადეთ საკარანტინო ადგილები. იმ შემთვევაში თუ მეპატრონეს არ სურს სასტუმროს დათმობა ეს იძულებით არ ხდება. ამ დრომდე ასეთი სიტუაცია არ შეგვხვედრია, არის მაღალი სამოქალაქო პასუხისმგებლობა“.

აბასთუმნის ფილტვის ცენტრში არსებულ საკარანტინო ზონაში დღეის მონაცემებით ყველა პალატა დაკავებულია.

22 მარტის მდგომარეობით, ქვეყანაში კორონავირუსის 54 დადასტურებული შემთვევაა. საკარნტინო რეჟიმში 2 956, ხოლო სტაციონალური მეთვალყურეონის ქვეშ 291 პირია. გამოჯანმრთელების სამი ფაქტი დაფიქსირდა.

[მარიამ ბარძიმაძე, ახალციხე]