აბასთუმნის საკარანტინო ზონაში კიდევ 24 მოქალაქე შეიყვანეს

აბასთუმნის ფილტვის ცენტრში აცხადებენ, რომ მოქალაქეები გუშინ, 19 მარტს, საღამოს შეიყვანეს.

„თბილისში რესპუბლიკური და მერვე საავადმყოფო საკარანტინო ზონები იყო და ახლა ჰოსპიტალის რეჟიმზე გადავიდნენ, ამიტომ იქ კარანტინში მყოფი ხალხი აქ შემოგვიყვანეს“, - გვითხრა ცენტრის კლინიკურმა მენეჯერმა კახა ბერიძემ.

მისივე თქმით, ფილტვის ცენტრში თავისუფალი ორი პალატა დარჩა. „2-3 სამ დღეში რამდენიმე მოქალაქეს 14–დღიანი საკარანტინო პერიოდი გასდის, და გვექნება ადგილები“.

20 მარტის მდგომარეობით, საქართველოში კორონავირუსის 43 დადასტურებული შემთხვევაა. 3 ახალი შემთხვევა დღეს გამოვლინდა. კარანტინის რეჟიმშია 1575 ადამიანი, სტაციონარში მეთვალყურეობის ქვეშ კი 275.

[მარიამ ბარძიმაძე, ადიგენი]