ახალციხის ოლქში არჩევნებში მონაწილეობა ამომრჩეველთა 51%-მა მიიღო

„რვა საათისთვის დაიხურა ყველა უბანი, მიმდინარეობს ხმების დათვლა. იყო გარკვეული პროცედუალური დარღვევები, თუმცა ეს არ ყოფილა ისეთი მნიშვნელოვანი დარღვევები, რომ აისახოს ხმებზე“, - განაცხადა N37 ახალციხის საოლქო საარჩევნო კომისიის თავმჯდომარემ თეა გავაშელმა.

აღნიშნულ ოლქში ამ ეტაპზე შესულია ხუთი განცხადება. თეა გავაშელის თქმით, ხუთივე განცხადება თითქმის იდენტურია.

„ძირითადად არის, რომ ერთი და იგივე სუბიექტის ორი წარმომადგენელი იმყოფებოდა უბანზე, ერთი შემთხვევა იყო N1 უბანზე, რომ მისულ ამომრჩეველს ხელმოწერა დახვდა საკუთარ გრაფაში“, - განმარტავს გავაშელი.

ამ დროისთვის N37 ახალციხის საოლქო საარჩევნო კომისიაში არცერთი უბნის მონაცემები არ შესულა.

„ველოდებით უბნებიდან შემოსულ დოკუმენტაციას და ხმების რაოდენობას, შესაბამისად, ვნახავთ თუ უბნებზე რაიმე დარღვევაა დაფიქსირებული", - ამბობს გავაშელი.

[sknews.ge]