ეზუგბაია: 11 პაციენტის ტესტზე მიღებული შედეგები უარყოფითია

ინფექციური საავადმყოფოს სამედიცინო დირექტორის, მარინა ეზუგბაიას განცხადებით, დღეს, 17 მარტს აღებული ყველა ტესტის პასუხი უარყოფითია. ამას გარდა დღეს კიდევ 11 პაციენტს აუღეს ნიმუში, რომელთა შედეგებიც ხვალ, 18 მარტს იქნება ცობილი.

„დღის მეორე ნახევრისთვის კვლავ 11 ტესტია აღებული და პასუხს გვიან ველოდებით. ალბათ, მათი შედეგები თქვენთვის დილისთვის იქნება ცნობილი. ინფიცირებული პაციენტების მდგომარეობა დილიდან საღამომდე სტაბილურია. არცერთი მათგანის მდგომარეობა არ გაუარესებულა“,- განაცხადა ეზუგბაიამ.

მისივე ინფორმაციით, ბოლო ორი პაციენტის მდგომარეობა, რომელთაც კორონავირუსი დაუდასტურდათ, არ გართულებულა.

„ბოლო ორი პაციენტის მდგომარეობა არ გართულებულა. პირველთან დადასტურებულია პნევმონია, პნევმონია მიმდინარეობს საშუალოზე მძიმე ცხელებით. კლინიკური მონაცემებით, მნიშვნელოვანი ცვლილებები არ არის გამოხატული, ის, რაც დამახასიათებელია ვირუსული პნევმონიისთვის. მეორე პაციენტთან ჯერჯერობით არ დადასტურებულა. დღეს ჩაუტარდება მას კომპიუტერული კვლევა და შეფასდება მისი საბოლოო მდგომარეობა. დანარჩენის მხრივ ცხელება გრძელდება, მაგრამ ობიექტური სტატუსი ჯერჯერობით სტაბილურია”.

ამ დროისთვის, ინფექციურ საავადმყოფოში 46 პაციენტი წევს. მათგან 28-ს დადასტურებულად კორონავირუსი აქვს. დღის განმავლობაში ახალი შემთხვევა არ შემატებია.

ცნობისთვის, საქართველოში ამ დროისთვის დადასტურებულია კორონავირუსის 35 შემთხვევა, რომელთაგან ერთი გამოჯანმრთელდა, კლინიკიდან გაეწერა და თვითიზოლაციაში იმყოფება. შესაბამისად, საქართველოში კორონავირუსით ინფიცირების აქტიური შემთხვევების რაოდენობა წარმოადგენს - 34 -ს.