სამცხე-ჯავახეთში თვითიზოლაციაში 36 ადამიანია

თვითიზოლაციაში ყველაზე მეტი, 18 პირი ახალციხეში იმყოფება, ბორჯომში – 8, ასპინძაში – 4, ადიგენში – 2, ნინოწმინდაში – 4.

დაავადებათა კონტროლის ეროვნული ცენტრის, სამცხე-ჯავახეთის განყოფილების უფროსის, ნინო ზედგინიძის თქმით, თვითიზოლაციაში მყოფი მოქალაქეები თავს კარგად გრძნობენ, ისინი ძირითადად ევროპის ქვეყნებიდან ჩამოვიდნენ.

ზედგინიძე აღნიშნავს, რომ ამ ეტაპზე თვითიზოლაციის წესების დარღვევის ფაქტი რეგიონში არ დაფიქსირებულა.

რაც შეეხება აბასთუმნის ფილტვის საკარანტინო ზონას, აქ სულ 16 ადამიანი იმყოფება.

ცენტრში 14 მარტს ნინოწმინდის საბაჟოდან ერთი მოქალაქე შეიყვანეს, რომელსაც დაბალი სიცხე აღენიშნებოდა, იგი ამ დროისთვის თავს კარგად გრძნობს.

დღეის მდგომარეობით საქართველოში კორონავირუსის 33 დადასტურებული შემთხვევაა. კარანტინის რეჟიმში 637 ადამიანია.

ბოლო დღე-ღამის განმავლობაში მსოფლიოში კორონავირუსს 683 ადამიანი ემსხვერპლა. ყველაზე მეტი, 368 ადამიანი ვირუსმა იტალიაში იმსხვერპლა, 96 პაციენტი დაიღუპა ესპანეთში, საფრანგეთში – 36. 113 ადამიანი გარდაიცვალა ირანში, ჩინეთში – 14.

კორონავირუსით მსოფლიოში ჯამში 6 518-ი ადამიანი გარდაიცვალა, 77 776 პაციენტი კი გამოჯანმრთელდა.

[მარიამ ბარძიმაძე, ახალციხე]