სამცხე-ჯავახეთში თვითიზოლაციაში 16 ადამიანია

დაავადებათა კონტროლის ეროვნული ცენტრის სამცხე-ჯავახეთის განყოფილების ინფორმაციით, თვითიზოლაციაში ახალციხეში 13, ასპინძაში ორი, ხოლო ადიგენში ერთი მოქალაქეა. მათი უმრავლესობა იტალიიდან არის დაბრუნებული.

რაც შეეხება ირანის მოქალაქეს, რომელიც ახალციხის რეფერალურ საავადმყოფოს ბოქსირებულ პალატაში იმყოფებოდა, ვირუსი არ დაუდასტურდა და იგი კლინიკიდან გაწერეს.

„თვითიზოლაცია გულისხმობს იმას, რომ პირი საკუთარ თავს ამყოფებს და აცხოვრებს საზოგადოებისგან და ოჯახის წევრებიგან იზოლირებულად. მათ შორის, სავალდებულოა გარკვეული წესების დაცვა. ცალკე უნდა ჰქონდეს გამოყოფილი ოთახი, რაც შეიძლება ნაკლები კონტაქტი, როგორც საზოგადოებასთან, ისე ოჯახის წევრებთან, გამოყენებული უნდა იქნეს ერთჯერადი მოხმარების ჭურჭელი.“ - ამბობს დაავადებათა კონტროლის ეროვნული ცენტრის სამცხე-ჯავახეთის განყოფილების უფროსი ნინო ზედგინიძე.

მისივე თქმით, საზოგადოებრივი ცენტრები ასეთ ადამიანებზე დაკვირვებას ყოველდღურ რეჟიმში ახორციელებენ, თუმცა რეკომენდაციას შეასრულებს თუ არა მოგზაურობიდან დაბრუნებული პირი, ეს მის სამოქალაქო პასუხისმგებლობაზეა დამოკიდებული.
ამ დროისათვის, საქართველოში კორონავირუსის 12 დადასტურებული შემთხვევაა.

[მარიამ ბარძიმაძე, ახალციხე]