რა სიტუაციაა სამცხე-ჯავახეთში კორონავირუსთან დაკავშირებით

დაავადებათა კონტროლის ეროვნული ცენტრის სამცხე-ჯავახეთის განყოფილების ინფორმაციით, რეგიონში ეპიდსიტუაცია საიმედოა. რაც შეეხება აბასთუმანში გახსნილ საიზოლაციო სივრცეს, ამ დროისათვის დაკვირვებას 26 პირი გადის.

„საიზოლაციო სივრცის პირობები სრულად შეესაბამება იმ პირობებს, რომელსაც უნდა აკმაყოფილებდეს საიზოლაციო სივრცე. პალატები აღჭურვილია წვრილი და მსხვილი საყოფაცხოვრებო ტექნიკით. ყველა პალატას გააჩნია სველი წერტილი, არის თბილი და ცივი წყალი, მომარაგებულები არიან ინდივიდუალური ჰიგიენური საშუალებებითა და უზრუნველყოფილი არიან დღეში სამჯერადი კვებით“.

მისივე თქმით, კორონავირუსზე ტესტირება მხოლოდ ლუგარის კვლევით ცენტრში კეთდება და ადგილობრივ დონეზე ამის გარკვევა შეუძლებელია.

„ნებისმიერმა პირმა, რომელიც ბოლო ორი კვირის განმავლობაში იყო მოგზაურობაში მაღალი რისკის ქვეყანაში, ან თუ იქიდან ჩამოსულ პირთან იმყოფებოდა კონტაქტში ან ისეთ პირთან, რომელსაც დაუდასტურდა კორონავირუსი, უნდა მიმართოს სამედიცინო დაწესებულებას“, - განმარტა ზედგინიძემ.

ახალციხის საზოგადოებრივი ჯანდაცვის ცენტრი, მუნიციპალიტეტში მცხოვრებ შვიდ პირს აკვირდება. სამი მარტის მონაცემებით, ქვეყანაში კორონავირუსის სამი შემთხვევაა დაფიქსირებული.

[თაკო ფეიქრიშვილი, ახალციხე]