‘შვიდ ადამიანს ვაკვირდებით’ - ახალციხის ჯანდაცვის ცენტრი

უცხო ქვეყნიდან დაბრუნებული მოქალაქეების თვითიზოლაციისა და მათზე მეთვალყურეობის შესახებ დღეს, 3 მარტს ახალციხის საზოგადოებრივი ჯანდაცვის ცენტრის ხელმძღვანელმა, ფატი ხაბულიანმა სამხარეო ადმინისტრაციაში გამართულ შეხვედრაზე ისაუბრა.

„დღესაც გვყავს იზოლირებული ოღონდ ოჯახებში, იტალიიდან, ევროპიდან ახალციხის მუნიციპალიტეტში შემოსული შვიდი პიროვნება, ეს მოხდა მერის წარმოამდგენლის ძალიან დიდი ძალისხმევის შედეგად, მუშაობს ხაზი 22–16 –24, მუნიციპალიტეტის მერის განკარგულებით მიეცათ წარმომადგენლებს დავალება“, - განაცხადა ხაბულიანმა.

როგორც მან „სამხრეთის კარიბჭესთან“ განმარტა, ამჟამად ინფორმაცია შვიდ ადამიანზე აქვთ, რომლებსაც პერიოდულად უკავშირდებიან და მდგომარეობას სწავლობენ: „საზღვარგარეთიდან ბოლო 14 დღის განმავლობში ვინც შემოვიდნენ ვიცით და ვაქცევთ ყურადღებას. ვცდილობთ ყველაზე დავამყაროთ მეთვალყურეობა, რომ არ გამოგვეპაროს მათი ჯანმრთელობის მდგომარეობის გაუარესება. სოფლის ექიმების მეშვეობით, სატელეფონო კავშირებით ვიღებთ ჯანმრთელობის მდგომარეობის შესახებ ინფორმაციას“.

მისივე თქმით, რეკომენდაციები გასცეს სასტუმროებისთვის და ახალციხის ციხისთვისაც, სადაც ტურისტების ხშირი მიმოსვლაა.

ხაბულიანის თქმით, ახალციხის მუნიციპალიტეტში საჭიროებისათვის საიზოლაციო სივრცე გამოყოფილია. გარდა ამისა, მუნიციპალიტეტმა ჯანდაცვის სამსახურს სადეზინფექციო სამუშაოებისათვის საჭირო ინვენტარის ოთხი კომპლექტი შეუძინა.

„ინვენტარი, რაც სადეზინფექციო სამუშაოების შესასრულებლადაა საჭირო, ჩვენს სამსახურს ჰქონდა ერთი წყვილი, მაგრამ ეს არ იქნებოდა საკმარისი. ამიტომ მერმა შეგვიძინა ოთხი კომპლექტი, მთლიანი აღჭურვილობა, რომელიც ამ საქმიანობისთვის გამოდგება. ჩემი სამსახურის ნებისმიერი თანამშრომელი, პირადად მე, 24–საათიან რეჟიმში, მზად ვართ ბაღები იქნება თუ სკოლები დავამუშაოთ“.

შეხვედრაზე ცნობილი გახდა, რომ რეგიონში მხოლოდ ერთი სამსახურია, რომელიც სადეზინფექციო სამუშაოების კვალიფიციურად ატარებს.

[თაკო ფეიქრიშვილი, ახალციხე]