‘ოცნებამ’ ყველაფერი გააკეთა, რომ სამცხე-ჯავახეთში მერაბიშვილის ავტორიტეტი გაძლიერებულიყო

როგორც ფოფხაძე „სამხეთის კარიბჭესთან“ აცხადებს, ყოფილი შს მინისტრი და პრემიერი, ვანო მერაბიშვილი ხელისუფლებაში ყოფნის დროს სამცხე-ჯავახეთში საჯარო ინტერესებს აკმაყოფილებდა, ამიტომ, რეგიონში „ნაციონალური მოძრაობის“ მიმართ დადებითი განწყობები კვლავ არის.

„ქართულმა ოცნებამ“ ძალიან უყურადღებოდ დატოვა რეგიონი და ობიექტურები რომ ვიყოთ, გაკეთებული საქმეებით, „ოცნება“ რეგიონში „ნაციონალურ მოძრაობასთან“ აგებს. ეს პირადად ჩემი აზრია. როცა ვანო მერაბიშვილი მონაწილეობდა რეგიონულ საქმეებში, კორუფციაშიც კარგად იყო ჩართული და თავისთვისაც კარგად ფულს აკეთებდა, მაგრამ საჯარო ინტერესებსაც აკმაყოფილებდა. თავის სანათესაოსაც აშოვნინა ფული და სხვებიც ჰყავდა ამ პროცესში ჩართული“, - აცხადებს ფოფხაძე.

მისივე თქმით, ბორჯომის მოსახლეობა მერაბიშვილის მიმართ ყოველთვის უარყოფითად იყო განწყობილი „შემიძლია მტკიცებულებებით ვისაუბრო ამაზე“.

დეპუტატი მიიჩნევსს, რომ „ქართულმა ოცნებამ“ ვერ გაატარა სწორი პოლიტიკა საკადრო ცვლილებების კუთხითაც. ერთ-ერთ მაგალითად იგი ასპინძის მუნიციპალიტეტის მერიაში განხორციელებულ ცვლილებებს ასახელებს: “მიმაჩნია, რომ ასპინძის რაიონში ლევან ცაბაძის გაშვება გამგებლობიდან და ახალი გამგებლის მოყვანა, რომელიც საოლქო საარჩევნო კომისიის თავმჯდომარე იყო და ვანო მერაბიშვილთან ნორმალური ურთიერთობები ჰქონდა, ესეც „ქართული ოცნების“ არასწორი სტანდარტია. „ოცნებამ“ რეგიონს ვერ შესთავაზა ის, რაც უნდა შეეთავაზებინა. არსებითად არაფერი შეცვალა. კორუფცია დარჩა, საჯარო მოხელეების უყურადღებობა დარჩა და რაღაცა ნაწილში კიდევ უფრო გაუარესდა“.

ფოფხაძე მერაბიშვილს კორუფციაშიც ადანაშაულებს და ამბობს, რომ რეგიონში ყველა კორუფციულ საქმეში ყოფილი შს მინისტრი ჩართული იყო: „მე მას ჩვეულებრივ კორუფციაში დავადანაშაულებდი. ამ ხელისუფლებამ ეს მტკიცებულებების სახით ვერ დადო და ბრალიც ჩემი აზრით, იყო შეზღუდული და კორექტულად მორგებული, ეს იყო უკვე ხელისუფლების პრობლემა. მე არ გამოვრიცხავ იმას, რომ ხელისუფლებას ჰქონდეს მაგისი ინტერესი, ესკალაცია მოახდინოს პოლიტიკური ვითარებით და ამიტომ აწყობს ის პოზიცია, რომ გამოვიდა [ვანო] და იძახის - „ჩვენ თქვენ დაგამხობთ“, - განაცხადა „სამხრეთის კარიბჭესთან“ დამოუკიდებელმა დეპუტატმა გედევან ფოფხაძემ.

[თაკო ფეიქრიშვილი, ახალციხე]