'გადავედით ინდივიდუალურ მუშაობაზე და ვვარაუდობთ, რომ მეტ მხარდამჭერს მოვიყვანთ არჩევნებზე' – გედევან ფოფხაძე

"საკმოდ კარგად ვართ მობილიზებული მეორე ტურისთვის. პირველ ტურში, მაგალითად, ჩემი ფუნქცია იყო ის, რომ კანდიდატს მხარს ღიად ვუჭერდი, მეორე ტურთან მიმართებაში, შტაბს ვთხოვე, რომ მეტი ორგანიზება იყოს. თუ ჩვენი მხარდამჭერები არ არიან ქალაქში და გასული არიან ქალაქიდან, დავეხმაროთ რომ მიიღონ მონაწილეობა არჩევნებში. ეს ჩვეულებრივ წინასაარჩევნო პროცესად მიმაჩნია. თუ ვიცი რომ ჩვენი მხარდამჭერი არ არის ბორჯომში და არის თბილისში შევეხმიანო, მოვუწოდო. გადავედით ინდივიდუალურ მუშაობაზე და ვვარაუდობთ, რომ მეტ მხარდამჭერს მოვიყვანთ არჩევნებზე", – განაცხადა გედევან ფოფხაძემ.

მისივე თქმით, თუ "ქართულმა ოცნებამ" ამ წლების განმავლობაში რაღაც ვერ გააკეთა ბორჯომში, "ეს ამ საკრებულოს თავმჯდომარის ბრალიცაა [გულისხმობს ზაზა ჩაჩანიძეს], ლევან ლიპრტია ახალი სახეა პოლიტიკაში. საუბარი იმაზე, რომ რაღაცა ვერ გაკეთდა და ეს მხოლოდ გამგებლის ბრალია და არა საკრებულოს თავმჯდომარის, არასწორია. თუ რამე იყო გასაპროტესტებელი, საკრებულოს თავმჯდომარეს შეეძლო ეს აქამდე გაეკეთებინა. პრეტენზიებს მათგან, რომლებიც მხოლოდ პოლიტიკური ამბიციების გამო გვტოვებენ, ვერ მივიღებთ".

გედევან ფოფხაძე ამბობს, რომ ზაზა ჩაჩანიძემ ხმების მეტი წილი იმიტომ მიიღო, რომ "ქართული ოცნების" სახელით იჯდა საკრებულოს თავმჯდომარის კაბინეტში და იქიდან ატარებდა საარჩევნო კამპანიას".

[sknews.ge]