მერაბიშვილი ახალციხის ციხეზე: ‘რაც იყო 8 წლის წინ იმას არაფერი მიმატებია’

„ერთ რამეს ვხედავ, რომ რაც იყო რვა წლის წინ იმას არაფერი მიმატებია, ამაზეც დიდი მადლობა. ჩვენი ბევრი გაკეთებული გააფუჭეს და გააჩერეს და ის, რომ აქ ყველაფერი არ გააფუჭეს მადლობელი ვარ", – განაცხადა ვანო მერაბიშვილმა ახალციხის ციხეზე.

მერაბიშვილი ამბობს, რომ, ახალციხის ციხის განვითარებისთვის ბევრი გეგმა ჰქონდა: „ამ კომპლექსს აქვს მუდმივი სტაბილური შემოსავალი და ამ სტაბილური შემოსავალით სარგებლობს არა მარტო ეს შენობა, არამედ ჩვენი ქალაქის მოსახლეობა. აგერ მითხრეს, ბინები აქვთ კაფეებად და სასტუმროებად გადაკეთებული და ჩვენ მოქალაქებს, ახალციხელებს აქვთ გარკვეული შემოსავალი. მე ვფიქრობ ეს არის ყველაზე მთავრი შემოსავლის წყარო ახალციხეში და მთელს კუთხეში და ამის ბაზაზე ვითარდება სხვა ბიზნესები. კარგი იქნებოდა ეს განვითარება გაგრძელებულიყო. მარშუტები მოგვეძია, იგივე თურქეთიდან ტურისტების მარშუტები, რომელიც ვარძიის გავლით აქედან შემოვიდოდნენ და საბაჟოს გავლით გავიდოდნენ ისევ თურქეთში. მე როგორც ვიცი ტურისტები საკმაო რაოდენობა მაინც დადის".

მისი თქმით, ადგილობრივებთან სამომავლო გეგმებზე მოგვიანებით ისაუბრებს: "ყველას მადლობა მინდა გადაგიხადოთ, ახალი გამოსული ვარ ყველას ვხდები ახლობლებს, მეგობრებს, ნათესავებს, პირველ რიგში ჩემი მშობლები ვნახე. შემდგომში უფრო საქმიანად, მომავლის გეგმებზე ერთად ვისაუბრებთ, მოვისმენთ თქვენს წინადადებებს – რა არის გასაკეთებელი, როგორ არის გასაკეთებელი და ჩვენ ერთად ჩამოვყალიბდებით თუ როგორ გახდეს ჩვენი ქვეყანა, ჩვენი ქალაქი უკეთესი, იმისთვის ჩვენი ხალხის ცხოვრება გაუმჯობესდეს".

მერაბიშვილმა ახალციხე მშობლების და ახალციხის ციხის მონახულების შემდეგ მალევე დატოვა.

[ნუკა სტეფნაძე, ახალციხე]