რა კავშირს ხედავს მიხეილ სააკაშვილი ჩახალიანსა და ბიძინა ივანიშვილს შორის

„სამხრეთის კარიბჭეს“ კითხვაზე: აპირებდა ვაჰაგნ ჩახალიანი პრეზიდენტის ნახვას თუ ეს მოულოდნელი შეხვედრა იყო, ვაჰაგნ ჩახალიანი პასუხობს, რომ მას პრეზიდენტთან შეხვედრა დაგეგმილი არ ჰქონდა: „ჩვენ მშვიდად ვიდექით, პრეზიდენტი მოვიდა ჩვენთან. ჩვენი მომხრეების ერთი პროცენტიც არ იყო იქ, მზად რომ ვყოფილიყავით, პირიქით იქნებოდა“.

ჩახალიანი ამბობს, რომ საუბარში პრეზიდენტმა მას ერთი-ერთზე საუბარი შესთავაზა: „ქვეყნის პრეზიდენტი მოქალაქეს ურთიერთობის გასარკვევად არ უნდა იბარებდეს. მითხრა 5 დღის შემდეგ შევხვდეთო, როგორც ჩანს, კონფლიქტი უნდა“.

ინციდენტის შემდეგ „სამხრეთის კარიბჭე“ მომხდარზე პრეზიდენტსაც ესაუბრა.

„პირველ რიგში, ეს ადამიანი, რომელიც სასჯელს იხდიდა, როდესაც თავხედურად აცხადებს, რომ ახალქალაქში ბოლო 10 წელი არაფერი გაკეთებულა, ძალიან გვაგონებს ჩვენი პრემიერ მინისტრის ბიძინა ივანიშვილის რიტორიკას, რომ ჩვენ ბოლო 10 წელიწადი საქართველოს ვანგრევდით. ვისაც თვალი და ყური აქვს აქ, ახალქალაქში, აქ კი ძალიან ჭკვიანი ადამიანები ცხოვრობენ, ძალიან შრომისმოყვარეები და მე ისინი ძალიან მიყვარს, განსაკუთრებით სწორედ მათი შრომისმოყვარეობის გამო, მათი კულტურისა და სხვათა შრომისა და კულტურის პატივისცემის გამო. აქ თავს ყოველთვის ისე ვგრძნობ, როგორც ჩემს სახლში. როცა ამ ადამიანებთან ერთად ამბობენ, რომ აქ არაფერი გაკეთებულა, ეს უბრალოდ უკიდურესი უსინდისობაა“, - განაცხადა პრეზიდენტმა.

შეგახსენებთ, რომ ახალქალაქში მყოფ საქართველოს პრზიდენტს მიხეილ სააკაშვილსა და საზოგადოება „ერთიანი ჯავახკის“ ლიდერს ვაჰაგნ ჩახალიანს შორის, დღეს, 25 ოქტომბერს, სიტყვიერი დაპირისპირება მოხდა. ჩახალიანმა პრეზიდენტს ეკლესიებისა და განათლების შესახებ ჰკითხა, რაზეც პრეზიდენტმა მას სეპარატისტი უწოდა და უთხრა, რომ მისნაირ კრიმინალს უფლება არ აქვს პრეზიდენტს მორალი უკითხოს.

აქვე შეგახსენებთ, რომ ეს პირველი შემთხვევა არ არის, როდესაც საქართველოს პრეზიდენტის სამცხე-ჯავახეთში ვიზიტი ინციდენტით სრულდება. 16 სექტემბერს პრეზიდენტს ასევე სიტყვიერი შელაპარაკება მოუხდა ახალციხის მცხოვრებ ბეჟან კაჭკაჭიშვილთან, რომელმაც მას ერთ-ერთ სასტუმროზე არსებულ ინგლისურ წარწერაზე ჰკითხა მოსაზრება. "ნაგავში იყო აქაურობა! ნაგავში ცხოვრობდით? ნაგავში ყოფნა გერჩივნათ?!“ - ასე მიმართა მაშინ პრეზიდენტმა სასტუმროსთან შეკრებილ ახალციხის მცხოვრებლებს.

[sknews.ge]